振彬伯伯，你身為青年事務委員會主席，話同我哋這些年青人非常傾得埋，咁好傾，我哋嚟傾傾點解我「歪曲」。傾完你就會幫我諗下點拆？

振彬伯伯，你叫我哋冇理由這麼快放棄自己，我放棄的唔係自己，而是放棄向地產商買窮人恩物，放棄做樓奴，放棄同你哋玩市場價格，放棄同那些拿個篋神出黎、拖個靚女落嚟現錢買樓的強國 uncle 爭。

好坦白而家我哋唔係沒有朝氣，我哋太有朝氣走去街頭抗爭你又話唔好，要我哋「袋住先」。我哋面對現實，唔係讀完大學便去申請公屋，而是滿十八歲就去申請公屋，放心啦，我哋大學畢業都冇公屋住到，因為你們設立咗個咩非長者單身人士公屋計分制，你估申請公屋咁容易，我又唔係那些一拖三落嚟嘅新移民，又唔係七老八十，等3年、5年、8年、10年，然後同我講超入息了，bye bye。單身入息限額仲係9千幾蚊。你估我想架咩？我又冇得揀。就算想申請都申請唔到啦。

當我 fresh grad，又唔係咩神科或者肯捱就得那些專科出身，問過師兄姐最多都係1Xk至24k，仲要冇咩加薪幅度，不過自己揀做嗰行就唔會怨的。反正餓不死我，只不過如果我想自立搬出去住的話，自住仲要市區，就真係要租劏房，唔租劏房同人合租，當幾條友每人三四千，已經可能去咗五分之一至四分之一人工。即使繼續同屋企人住，都要還學費，儲錢進修或再讀 master，畀下家用阿媽洗……我唔拍拖、唔去旅行、唔去玩，我窮到燶都要食飯搭車架，咁我剩幾多錢買樓呀，你話我畢業五六年就畀到首期？

我當我上面點都死剩三分之一人工黎買樓，當有6K，一年儲到7萬2，唔係好叻但都做下少少保本投資咁，一年頂多儲到8萬。我要儲起碼層樓的三成至四成啦，以高慧然「可憐的香港人」入面的例子：「沙田縮水樓河畔花園一個實用面積242平方呎的蚊型單位賣出不可思議的高價：385萬，平均呎價接近16,000元！與皇牌屋苑太古城叮噹馬頭。」平心而論二手縮水樓都好過那些蚊型豪宅同新式發水樓，因為分分鐘新樓隔離那間屋係冇人住，係「擺」喺度，想有個鄰居都沒有，但首期我要115萬5千，我就要儲14年半喇，未計佢會升值，我仲要繼續供樓。689上台之後，佢民望同人格就跌到落谷底，樓價沒有跌，仲升緊添，暫時仲係有班炒家同埋大陸買家撐住。我咁辛苦捱生捱死就為層樓，唔好講笑啦。我有得揀咁我不如住公屋。有咩唔好，一千幾蚊租，有個安樂窩，有房署幫我管理屋苑，平日會有保安好得閒趕走些擺地攤婆婆，又有些區議員嚟關心下你，又唔俾人養狗，又會有公共設施，實有交通配套。不過公屋都冇得我住，然後白表抽居屋咪同中唔中六合彩一樣囉。

我上到樓咩？唔好講上樓，剩係想住下 Hall 都好困難啦，要咩兩年一宿、四年一宿，除非我住天水圍、屯門、元朗。之不過，有些人執著要有層樓先結婚，呢啲係詛咒黎嘅。邊個叫我們沒有好似新加坡那些公共房屋，仲要有些專給大學生住，你只要係有大學畢業證書，你就有那個福利。發展新界東北又你欺騙邊個，你想整蓮塘口岸，你想整個中港城咋嘛，唔好講到話起公屋咁偉大，係都要搞農田，係都唔可以改下些發展模式，係都要有吳亮星同陳茂波呢啲既得利益者喺度，係都要破壞程序公義，係都要最後又搞著些幫村民著想的八九十後又走出嚟。

留返啲錢同朋友一齊創業（但租金依然好貴）、出國進修讀書、培養下興趣、去工作假期體驗下、旅遊開闊下眼界等，做任何一樣事情都比買樓更有意義。

咁你叫我揀要不要放棄？