前幾日，我去上水見我朋友。我知道，經過今次見面後，我哋唔再係普通的朋友，而係真真正正的好兄弟。點解？古代都有關羽千里走單騎過五關斬六將啦，今有我逼入地鐵車廂迢迢千里會朋友，咁重情重義，緊係好兄弟。

放工時間的地鐵站，由金鐘轉去尖沙嘴，再由九龍塘轉乘東鐵，當你經歷過如此擠迫的車程，你就會發覺用「沙甸魚」依個比喻形容塞在地鐵車廂的香港人，真係絕妙。沒錯，成段車程，我根本就係一條塞在細小罐頭的沙甸魚，唔好話打開份報紙黎睇，連想轉歌聽，都無位比你伸手按電話。

不過咁都唔係最大問題，最大問題係我隔離的係一堆堆大陸人！你試下想像，當你打開一個罐頭沙甸魚，發覺入面竟然大部分都係豆豉鯪魚，而唔係沙甸魚，你會有咩感覺？香港地鐵以前都好擠迫，至少大家都知道大家係經歷過一整日工作折磨，趕住回家休息，所以再迫，至少同聲同氣，感同身受，所以忍得就忍。但如今成車都係同沙甸魚溝唔埋的豆豉鯪魚，佢哋有時盲衝盲撞都算，仲要一人拖住幾個喼，喼入面都係比佢地搶貴晒的香港日常生活用品，仲要放工時間同香港人一齊迫係地鐵度，你叫香港人點會唔暴躁？

不過，對於依個問題，身為港人政府的局長蘇錦樑竟然只係輕描淡寫地回應：「地鐵迫爆，等多一班車就無問題。」即係又要香港人忍。香港人已經忍左好耐，尤其是打開電視或報紙，見到特區政府的廢官仲未落台，竟然可以忍到唔暴動，已經好厲害。到底蘇局長想考驗香港人的耐性幾多次？當我愈諗愈嬲的時候，有個大陸人拖住既喼車轆過咗我隻腳，佢明知如此，不但無道歉，更頭都唔回好瀟洒咁落車。不過，咁都唔叫神奇，最神奇係，我竟然無爆粗X佢。係依一刻，我先知道原來香港人的忍耐力真係幾高。

終於到了上水，一個鐘的車程，企足逼足全程，真係攰死。見到朋友，就立即問佢食咩，話想搵個餐廳坐低休息下。點知佢同我講依度的餐廳到處都要等位，無咁快有得坐。我問佢有無快餐店可以先坐一陣，佢竟然話依度的快餐店都要等位。快餐店都要等位，咁仲叫唔叫快餐店？好深，我睇唔透。

反正都要等位，我地決定食好啲，去一間連鎖日式餐廳食壽司。行過去時，途經幾個街道與商場，行人九成都係大陸人，而且唔少已經唔係拖住喼車咁簡單，而係推住一架架鐵推車，車上係一大箱又一大箱載住日常用品的紙皮箱，係街上穿插，或者停係街道中心派貨。最令我突兀係街上的中學生都係講普通話，而唔係講廣東話，我真係愈睇愈糊塗，懷疑自己係唔係返咗大陸。

我同我朋友講：「真係恐怖，成街都係水貨客，連學生都唔係講廣東話，唔怪得之前有人話上水淪陷。此情此景，話係淪陷，真係唔誇張。你到底點頂得順？」

朋友聽後，只係苦笑說了兩個字：「慣了。」到底依兩個字背後包含了多少辛酸，真係只有佢先真正明白。男人嘅嘢，唔需要講出口，我只係輕輕地拍了拍他的肩膀，以示慰問。

嗰餐飯，我地足足等了半個鐘，終於有位入座。店內的侍應全程都係用普通話招待客人，而餐座旁邊的大陸人叫了一碟又一碟的貴價魚生，狼吞虎噬。我看着那一塊塊色澤光潤的魚生，彷彿香港昔日的一碧輝煌，最終都被進擊的大陸人一塊塊吞掉。

食完飯，我話想行下，朋友話無咩好行，周街都係藥房、金鋪、莎莎與水貨客，早尐返屋企休息好過。佢話送我去搭火車，我話唔駛，火車站附近非常擠迫，要入站如同玩碰碰車一樣要不斷同人「撞」肩而過先入到去，自己走就可以。

與朋友道別後，我就乘火車離開大陸，啊，上水先岩。對於中港矛盾，有人成日話要包容兩地的文化差異，我諗我朋友先係真正應該被包容與體諒果個，佢喺上水生活，根本就好似卡繆筆下所寫的《異鄉人》一樣無處容身。我好慶幸自己不是住在上水，不過，我知道，如果香港人再唔團結起來，好快成個香港都會變成上水。

（圖片來源：北區水貨客關注組）