傳說這個地方有一條赤色妖蛇，出沒地點無人說得準，因為，見過牠的人，也會性命不保。

一日，一班遊人不理這個傳聞，挑戰一條人跡罕至的山徑。川文一直跟隨大隊，目的地是那裡，不清楚，沿路走過什麼地方，不知道。

「真係唔使擔心？聽講真係有妖蛇㗎喎。」走在後排，只懂跟隨大隊的川文開始對這種一無所知感到不安。

「你而家係咪唔信大隊先，成班人要一條心先可以行到終點，你咁多疑慮，對成件事無好處。」最先開口的是寶輝，只要任何人對團隊有所懷疑，就會第一時間走出來回應。

「但我哋而家行緊條路可能有危險，想睇下係咪應該行落去啫⋯⋯」川文嘀咕。

「你即係話我哋行錯路啦！你係咪鬼，想我哋成班人盪失路，俾妖蛇食落肚！」寶輝特意說得大聲，讓前排不知就裡的人以為川文真的是鬼，眾人紛紛投以厭惡的眼神，勢孤力弱的川文被壓下了。

棒子之後，就是蘿蔔。這時候，卓琳走到川文身邊加以安慰。

「我哋唔係話你係鬼，不過咁喎，你喺成班人面前講埋啲咁嘢，好難唔懷疑你㗎嘛，係你令我哋誤會你咋。」卓琳用溫柔的語氣說著歪理，卻有著無比效力。

「咁好啦，我以後會注意，唔會再講呢啲嘢。」川文竟然真心認定自己理虧在先，道起歉來。

三人說著說著，不知不覺跟大隊走失了，寶輝馬上提議抄捷徑。

「唔好喎，萬一真係行錯路，返唔到轉頭㗎！」川文又一次用理性去質疑。

「我十年前行山嗰陣你喺邊？你憑咩質疑我，咁你話我知點樣行捷徑先唔會有事啦！」寶輝只有氣勢沒有理據的反擊令川文無言。

「好好地有大路唔行，咩事要行捷徑先？」川文仍想理性討論。

卓琳這時候加入：「你唔好咁固執啦！而家最重要嘅係團結！」矛頭直指川文。

「團結」「固執」這些字，就如魔法一樣，川文失去了思想上的防衛，

「咁好啦，你哋點話點好。」決定把自己的未來交到這些人手上。

三人在小路走了不久，濃霧從四方八面飄來，眾人感到異樣。

「嘩！赤色妖蛇呀！」卓琳大叫，川文不知就裡，被二人推到前排。

只見妖蛇望著三人，仰首吐舌，慢慢接近。「喂！唔好推呀！」川文大叫。

「你唔好叫得咁大聲呀，激嬲妖蛇，大家都無運行㗎！」寶輝警告川文。

「嗱！古有佛陀割肉餵鷹。你應該抱持呢種態度。」卓琳推著川文背脊。

「個故事係割自己啲肉，唔係自己去叫人割肉喎！」混亂間，川文也蠢不了。

「咁我講完，你咪應該自動自覺囉！呢啲大愛精神你唔係唔肯付出下話！」卓琳歪理攻擊。

「你又唔去實踐呢啲大愛精神？！」川文反擊。

「你係咪男人嚟㗎！男人老狗同個女人嘈！」卓琳使出必殺技，就是女人要更平等的「男女平等」。

「呢個時候我哋要團結，咁啦！我哋擲公字決定啦！」寶輝又嘗試充當話事人。

「好啦！」川文認為是公平方案。

三人看著寶輝手中三枚硬幣，「嗱！擲到三個公，你犧牲自己衝上去。」川文點頭。

開，兩公一字。「好，我哋再擲過。」寶輝即時大叫。

「今次到你。」川文以為今次擲出三公就是寶輝去。

「咩呀！擲到三公，你咪要去囉！」寶輝懶洋洋地更正，川文瞪大了眼。

「喂！你唔係要我去下話？我女人嚟㗎！」卓琳又再祭出屬於她的女性主義。

「嗰三個銀仔我拎出嚟㗎，你仲想同我計？你喺度阿之阿佐，條妖蛇最高興㗎！」寶輝說得大義凜然。

「激嬲又唔敢，高興你又知！我X你啦！」川文終於忍不住發難，一手打翻寶輝手中的三枚硬幣，「你破壞團結……」寶輝卓琳齊聲說完，就把川文推開。

妖蛇把握機會，閃身上前把川文咬死，剩下二人嚇得目定口呆。放下死去的川文，轉去打量二人。二人不知所措，只管站得定定。

妖蛇在二人身邊不停徘徊，蛇類獨有的體溫探測竟然絲毫沒有人類應有的溫度反應，奇怪眼前兩件人形物體竟跟自己一樣是冷血動物，便只向二人大吼一聲，作為一個宣示主權的威嚇，就帶著川文的屍首退回濃霧之中。

寶輝、卓琳二人就在慌張的叫聲中拔腿狂奔。此後，更打著「憑理性驅趕妖蛇的生環者」這個旗號，不斷帶著無知的遊人在山中亂跑。