譚玉瑛姐姐比人升咗上神台，比 TBB 調咗做顧問，以後會少啲係兒童節目出鏡。大家都好激動，話要去電視城抗議遊行，到底大家係咪真係咁 Like 譚玉瑛姐姐呀？我認真的思考咗一陣，發覺我最鐘意的其實唔係譚玉瑛姐姐，我鐘意的其實係那個「舊時」。

我是八十後，我是睇《閃電傳真機》時期的譚玉瑛。那正正是兒童節目輝煌的時候，我勁掛住的不只是譚玉瑛姐姐，勁掛住的係我哋那個「舊時」：

• 勁掛住那個 TBB 同亞洲亞洲連兒童節目都有競爭的年代，你仲會拎個遙控撳來撳去，又睇 TBB 的《咕嚕咕嚕魔法陣》同《長腿叔叔》，亦會睇亞洲亞洲的《蠟筆小新》同《義犬報恩》。
• 勁掛住《閃電傳真機》卡通片時段，星期一、三、五係播女仔節目，好似《美少女戰士》；星期二、四、六係播男仔節目，好似《魔神英雄傳》。咁我當然係唔執輸，星期一睇到星期六啦。
• （後來我升左上中學，電視台為咗唔好畀細路追看卡通片，星期一至五，每天都播唔同的卡通片，咁啲死靚仔就唔可以一三五二四六的追睇卡通片了。）
• 勁掛住那個唔洗補習，上午校同學會恥笑下午校同學要睇「隔夜」卡通片，同屋邨小朋友sss熱烈討論卡通片討論到鬧交的年代。
• 勁掛住只有電視的那個年代。食完中午飯，下晝呃呀媽要做教育電視堂功課，睇完明珠台教育電視，再睇國際台教育電視，再接住睇閃電傳真機。
• 勁掛住星期五，閃電傳真機讀出細路寄畀兒童節目主持的來信。（我諗寫信呢個環節已經隨着上網問功課環節上場而消失。）
• 勁掛住 TBB 有張潔蓮姐姐同蓋世寶姐姐，亞洲亞洲有袁潔儀姐姐的那個年代。

大家記唔記得，好多卡通片都無喇喇 cut 咗，冇播到結局架。我好記得美少女轉身變，係變走咗個結局架，細細個冇得睇結局真的好谷氣。我而家又會諗，其實而家啲細路，仲鐘唔鐘意譚玉瑛姐姐，譚玉瑛姐姐係兒童節目主持，我哋係唔係應該問返而家啲細路，而唔係我哋一廂情願的留住「我哋年代」的譚玉瑛姐姐。（正如我哋鬧政府唔發視牌比 WIKI 王，唔重視觀眾民意。咁換兒童節目主持，又真係要問下啲靚仔喎。）

我哋冇咗譚玉瑛姐姐要遊行，係我哋呢代人的意願，因為我哋都怕冇咗譚玉瑛，就冇咗我哋的回憶，我哋都好自私的希望我哋開心的童年，可以好似留住譚玉瑛咁留低。

PS. 話說回頭，譚玉瑛姐姐能做一份職業，做到街知巷聞，睇到大家欲罷不能，真的好厲害，佢留唔留低係 TBB 我都祝福佢。
其實好想 TBB 訪問下而家啲細路的意見，定我太天真，而家啲細路個 schedule 忙過習近平，可能佢哋根本冇時間「一齊分享睇電視的樂趣」。至於我自己，我為我童年可以睇卡通片睇到天昏地暗而感到十分高興，你有睇的話，你懂的。


（原文載於作者面書專頁，標題為編輯另擬。）