今日放工行經葵芳，醒起一間 openrice 上廣受劣評嘅甜品店「甜牙牙」，評論話佢哋啲心太軟雖然個外表好靚，但食落又苦又酸，好能夠反映倒失戀少女嘅心情，咁啱心情不佳，我決定去挑戰吓！希望佢能夠刺激一下我嘅味蕾，令我重新振作！



甜牙牙嘅裝修以木為主，走清新風格，可惜啲櫈太細張，應該唔鼓勵大家坐低慢慢食傾吓偈。不過香港係咁架啦，地貴租貴，食完好走喇！接多一檯得一檯呀。



我想試嘅就係呢個$48嘅完熟 Classic 心太軟，但落單時店員好熱心，建議我試佢地嘅新出品，$68抹茶心太軟。咁既然新出品，比個機會你平反一下都好！於是我最後點咗個抹茶心大軟。



店員一早話我知要等20分鐘，所以等得比較耐，但都可以接受。玩咗一陣facebook之後，抹茶心太軟嚟喇！



「................」
我係咪暴露咗身份？點解佢比舊炭我？係咪怕我失望？Menu上面嗰份抹茶心太軟明明係焗得鬆鬆脆脆，淺淺嘅綠色外皮印上一個精緻嘅星星圖案，再灑上甜蜜嘅糖霜咁樣樣架。典解，典解我嗰舊係純黑色。

OK，舊心太軟咁黑，佢應該最差只係同普通心太軟一樣味，可能仲充滿濃郁嘅朱古力呢？唔好咁快下定論！我一邊鼓勵自己，一邊小心奕奕咁用叉將心太軟分開。

我知道係抹茶，佢入面啲醬係深綠色好正常，大家唔好鼓躁住！等我試吓味先！



外皮熱辣辣，脆脆哋有陣燶味，入面嘅抹茶朱古力好特別，又甜又苦又酸，就係冇抹茶味。配合埋一齊，果然集齊少女失戀果種氣憤（燶）、回憶（甜）、傷心（苦）、妒忌（酸）嘅味道！不過，如果真係失戀，勸妳都係食餐好氹吓自己好過嘞。

日期：2015年5月13日
時間：12:35pm
價錢：$68
地址：葵芳新都會廣場167號店舖