離暑假仲有兩個月，今個 weekend，有700幾個家長喺沙田致臻研習社，通宵排隊報暑期補習班，香港人真係咁鐘意排隊？
「咁多人排，實係好野」
求吓你話我知，而家有咩唔使排？
→ 住公屋要排，買私樓要排，買骨灰龕都要排。
→ 朝早買 M 記排到輪候公屋咁，weekend 去咖啡弄 high tea 排到輪街症咁排出街，夜晚宵夜食綠茶雪糕都要排，我就食唔出綠茶雪糕有咩唔同，都係元氣壽司綠茶粉開出來嗰種味。
→ 好啦，幼稚園又排，小學又排，而家暑期補習班都要排通宵嘅。
－－－－－－－－－－－－－－－－－－－－
700人排，哈利波特讀過呀？讀完係唔係佛地魔都唔夠我砌？
我唔信學校可以一夜成名，口碑係好似強積金咁要滾存。我識咁多老師朋友，識咁多「沙田友」，我周圍問，都唔知有呢間野。
上返佢網站，小學暑期班，補晒中英數，一星期返三日，每日個半鐘左右。內容冇詳細講，主要係來年中英數嘅重點課程，答題技巧。單靠口碑，間補習社可以吸到700人早兩個月排隊報。係唔係報升小六班，補完直升大學？
新聞訪問家長，家長話補習社教啲野其他地方學唔到，補習社經常超時，考試期間朝十晚十操練模擬試卷。原來OT就係好野，唔怪得我公司呀姐成日覺得O咗T先係有做嘢，補習都要OT，係唔係要啲細路早啲面對殘酷嘅現實，小學開始練習OT嘅能耐？
－－－－－－－－－－－－－－－－－－－－
唔好輸喺起跑線上，咁條線到底喺邊？
根據 theory of 「執輸行頭慘過敗家」，總之唔理你有幾早，你都係遲。我嗰個年代，足3歲先返學。唔知幾時開始，幼稚園有先修班，然後報幼稚園先修班要先上面試班。呢啲 pre pre pre 班點解愈推愈前？之前，Amanda Tann 18個月 BB 面試班大把人報，到底遲啲係唔係陀緊BB就要開始補習？
－－－－－－－－－－－－－－－－－－－－
暑假的意義：
我唔相信暑假的意義係要快人一步學晒啲野，而家好趕咩？話明抖暑，就畀個細路抖下啦，暑假報補習班，又學返學校啲嘢，不如唔好放暑假啦，家長直接向教育局動議一年上晒365日堂啦。
我最憎老師講「暑假唔可以玩創晒個心」，你都傻傻地，返學唔畀玩，放學又唔畀玩，暑假又唔可以玩，幾時先可以玩創個心？暑假我就係想玩創個心，我可以日日方力申咁學習游水4式，可以睇晒成套金庸，可以日日喺屋企玩 master chief，不停去公園撲蝶。
我幾時都企喺細路個邊，本身暑期作業已經係好冇人性，明明暑假可以玩到天昏地暗，係要個學生心掛掛，有手尾跟，你啲大人 annual leave 去旅行都唔想 check 公司 email 啦。暑期作業擺明亂做架啦，啲 MC 題，我睇都唔睇，我就平均分配晒啲 ABCD，根本暑期作業都應該取消啦，我 hea 做時，老師都係寫個 SEEN 架啦。
－－－－－－－－－－－－－－－－－－－－
當暑假變晒質：
→ 其實個700個家長可能好忙，暑假完全冇時間陪個細路，所以最好個細路 full schedule，忙過習近平。我好記得英皇個 Mani 講過，佢唔可以畀啲 artist 將賺錢嘅時間訓咗去咁嘥，而家啲家長就好似 Mani 管理 artist 咁，真係好有壓力。
→ 我唔明點解而家啲功課要親子做，自己的事自己做，拖埋呀媽落水真係冇人性。我又唔明點解啲功課要求增加學生體驗，要學生寫暑假呀媽帶咗你去邊玩，寫篇感受出來。搞到做功課同參加暑期活動好似 sales 跑數咁。
→ 我更加唔明點解一定要參加遊學團學英文。成班香港細路去到外國，又安排上同一班，同喺香港上堂有咩分別？
－－－－－－－－－－－－－－－－－－－－
暑假好心去玩啦，上地獄暑假補習班會造成心靈創傷呀...
700個家長排嘅補習社我就唔 PO 多次同人宣傳啦，我深信天下烏鴉一樣黑，間間補習社都係不停做作業，有個看更看住個細路做渣嘛。
至於我自己細個嗰時，做晒學校暑期作業，呀媽都還神。如果我係個細路，知道呀媽同我報呢啲班，要做 extra 暑期作業，我會嚇到瀨屎，成個暑假用包大人都唔掂呀。
－－－－－－－－－－－－－－－－－－－－
係唔係我早啲學，我就學得叻啲？
同大家分享下，我讀個間小學嘅「快人一步」制度。英文同數學科會比其他學校教快好多，有幾快？好似 fast forward 咁快，一年級會教到二年級上學期嘅書，如是者，二年級下學期就會教三年級上學期嘅書。六年級下學期，就會教中一上學期嘅書。
家長實覺得「快人一步」制度係德政，但好不幸，事實證明，大部份同學喺一年級個 fast forward 期都跟唔上。2年級上學期有部份同學宣佈 certified ，由2年級開始，之後5年都係陪太子讀書，「快人一步」制度成就精英嘅同時，真係死傷者眾，好多同學仔陪葬。
另附上次提及嘅Amanda Tann 18個月BB面試班文章：
http://www.passiontimes.hk/article/04-24-2015/22568