如果真心有留意開劣食的朋友，多多少少都聽過位於銅鑼灣金百利四樓的 pancake colours 大名，網上劣評不外乎話佢地服務態度差、食物難食、肉冇肉味咁上下，我覺得好奇怪，因為香港地其實大部分餐廳都係咁，到底有乜值得大家咁劣評呢？

於是，星期五趁lunch time, 我就忍不住好奇心，上去試一試。



一入到去，個裝修真係好悲劇，全場傢俬五顏六色，各據一方，有田園風有糖果色塑膠皮梳化有閃閃 disco 櫈有貴族風扶手椅......等等。但偏偏，個燈光卻係昏暗陰沉、而且一抬頭仲會見到鬼五馬六九唔搭八嘅巨型吊燈。

你知唔知個feel似乜？個feel就好似我去咗真實版嘅 Facebook page 二手傢俬電器專區咁。



侍應安排我坐咗響閃閃disco區，然後我叫咗個$60的肉眼扒餐。

個餐上得非常快，首先是白湯。



然後扒餐熱辣辣上枱



食完個扒，我想講句公道話。$60個扒餐，你想食到乜？

老老豆豆，去茶餐廳鋸扒，啲雪藏扒分分鐘雪咗幾十年仲老過你同我，食之前直頭要叫聲前輩先好起筷。

係，佢係又霉又冇肉味又落咗好多鬆肉粉，但係呢個價錢係食呢個味道咖啦！

係，佢啲薯菜又溶又濕，但係呢個價錢係食呢個味道咖啦！

細個逢生日先可以鋸嘅茶餐廳扒，咪同 pancake colours 一樣味？



大佬，埋單$66，你到底想食到啲乜？！

我甚至覺得大家好有必要上去觀摩一下佢個裝修，不過唔好打算用60蚊食到一份頂級牛扒囉。

日期：2015年5月22日
時間：12：30pm
地址：銅鑼灣金百利中心4樓
價錢：$66