自細，總有人喜歡教你做人唔好標奇立異，要穩打穩紮，跟住個社會規則玩，先至順風順水，唔會行歪走錯。親戚、朋友、長輩、社會都對自己有期望，往往，呢啲不必要嘅期望都害死人。

點解要贏在起跑線，歲幾就要讀預備班，再上堂學做面試之王，我唔撚知，點解人仔就要有 Portfolio，學你哋大人嘅談吐禮儀，學幾種不知所云嘅語言，學識乖乖坐定定做場大龍鳳先有書讀，我淨係想跑跑跳跳接觸多啲個世界，感受吓咩叫大自然。正襟危坐匿喺冷氣房日子，往後讀書有十幾廿年機會，甚至乎打一世 Office 工都要，何必年頭幾年嘅快樂都要被奪去？

讀到中小學，不斷操 Paper，十鳩幾科死記爛背，讀完出嚟就升到好學校，之後就搵到好工？點解美術、音樂、體育當做副科唔重要？我唔撚知，我有興趣有天份，你憑咩剝奪我趁細發展「副科」嘅潛能？

點解踢波冇出息？我唔撚知，足球小將戴志偉係漫畫人物，假嘅，咁歐陽耀冲堅喇掛？有細路想踢波就叫人咪制，港隊輸波就鬧人廢，喺香港踢梗係冇前途啦，有班功利主義者睇唔起人吖嘛。

點解打機冇出息？搵唔到食？我唔撚知，你睇吓韓國、德國、美國幾多遊戲設計師、Programmer、Tester係職業？人哋成個行業呀，講番香港，都出咗個爆機達啦。你哋當年冇，唔代表呢家同將來冇，放手比後生自己揀啦。

點解上網買衫敗家？浪費青春？我唔撚知，敗家得過去舖頭買，個價大部份係比地產霸權㗎，上網又平，又有特別款，襯番自己 Style，玩得叻有窿路仲可以自己開網店，賺番啲洗費添呀。

點解入 U 要一定係 BBA、法律、精算先叫神科有前（錢）途？我唔撚知，幾多 BBA 出嚟唔知自己做咩？個 PCLL 同精算師牌幾多畢業生考極都考唔到？點解我唔可以讀番有興趣嘅科揀自己條路？

點解一定要入大公司做小螺絲？點解我要被剝削朝九晚十一打份牛工？我唔撚知，但係我知細公司可以快啲學到多啲野，晉升機會快啲；但係我知自己搞 Start-Up，去碰去試去實現我嘅野心；但係我知 Working Holiday 可以體驗生活，讀萬卷屎片不如行萬里路。

點解一定要三十歲前結婚？否則就係剩男剩女？我玩多幾年就好似有罪？唔買樓就係失敗者？點解要成家立室？我唔撚知，我仲想睇下個世界喎，我唔想一世服侍地產霸權喎。

點解我生咗個細路就要催谷佢？點解要好似其他怪獸家長？點解我唔可以用多啲時間教下佢做人，而唔係為咗贏在起跑線儲 Portfolio？然後個仔女由上面第二段 Loop 番落嚟，再怨佢嘅父母（我哋），一代一代咁無限 Loop，要死跟個社會規則玩，然後回頭睇番後悔莫及？

點解順從社會期望？點解要組織話、跟規矩、追隨所謂傳統、不得出走、不准分裂？我唔撚知，淨係要做番個獨立自主嘅人。

時代變，唔好再用以往價值觀強加於他人。

呢篇文好多「我」，因為人生是自己的，快樂是自己的。別人說三道四是無謂的。條路我自己揀，仆街喊死都關人忍事。

按：題目出自LMF《La Na La》歌詞