熱血時報 | 日本治安真係咁好? 實驗結果係...

日本治安真係咁好? 實驗結果係...



日本治安真係咁好? 實驗結果係...



(講明先,搞笑向)

大家身邊梗有人會讚日本相比其它國家嚟講好安全呀,治安好呀,但真相係咪咁呢?

美國有位人兄Godfrey Chan都有咁嘅疑問,決定趁住去日本仙台,出席程式語言Ruby年會「RubyKaigi」嘅機會實地測試。

佢選擇嘅實驗方法係「路不拾遺」:Godfrey響會場搵一個最顯眼嘅地方,放低兩個100日元銀仔,然後過一段時間再返去望望。結果發現...




竟然多咗100日元,變成300日元了!XD

Godfrey將結果擺上Twitter之後,引來熱烈討論。當中當然不乏「認真撚」去剖析個實驗有幾唔科學唔嚴謹得啖笑;有網民就笑指似乎有人把放置點當成賽錢箱,或者以為好似神社許願池之類嘅能量點所以擺低銀仔;又有人估計100日元都係附近執到,順手擺埋一齊當失物認領;又有人趁機分享遇到日本人拾金不昧的體會;也有人提醒雖然日本治安良好,但當地不單只有日本人。不過無論係咩反應,都可以肯定不少人對個實驗結果感到吃驚。


連Godfrey面對結果都不知所措,只能出tweet問大家「多咗100日元完全超出了我預期...我可以點處理?」

當然戴頭盔都要講句,上述孤例不能作準,測試時嘅地點、人流、貪念、懲罰、有無人睇到、當時等唔等錢駛、物品價值等等都存在變數,而且看管好財物也是個人責任啊。

另外根據日本法例,盜竊罪最高可判監10年及罰款50萬日元,唔係走投無路一般都唔會以身試法。無謂丫!

(圖片來源:Twitter)


作者
讀者回應
相關文章