有時都羨慕女士們可以在車輛行駛途中畫眼線，雙手仲鎮定過醫生拎手術刀。不過意外嘅嘢話嚟就嚟，泰國日前就發生一單。

據英國《每日郵報》報道，日前泰國曼谷一名20多歲女子坐的士去見朋友，的士行駛途中收掣不及與前面貨車相撞。當時正在的士後座畫眼線嘅女子整個人向前樁，手上眼線筆就順勢直插佢左眼。

意外發生後女子少量出血及流鼻血，一直插住支眼線筆逗留車上等待救援，雖然劇痛但仍然清醒。女子送院治理後發現眼線筆好彩避過眼球重要部位，相信傷癒後無礙視力。

負責的醫護人員也以「古怪事故」形容今次意外，又指類似事故屬罕見。不過醫護人員都提醒女士們，儘量避免在車輛行駛途中化妝，始終意外嘅嘢唔到你控制。萬一發生同類意外，切勿強行拔出以免撕裂傷口。

（網上圖片）