近日爪哇控股（0251）申請禮頓道8號改劃，銅鑼灣皇冠假日酒店起咗僅僅八年，就想拆卸，再起商場商廈。灣仔楊雪盈議員發起聯署反對，專欄作者、「著名細價股炒家」周顯則撰文為地產商背書，其歪理連篇，教人嘖嘖稱奇。

先睇周顯《楊雪盈就皇冠酒店改建的公開信的我見》。文章怪論突出，左一言「銅鑼灣最缺的是商場」，右一語「不搔（騷）擾居民也搔擾了」，背離常識，不學無術；令人咋舌，原來撈個專欄格仔嘅門檻如何低。千怪萬異，卻不外乎子華神所言嘅一句「搵食啫，犯法呀」：地產商要謀利，唔犯法就無須阻止。

呢啲人眼中，地產商要賺錢，居民無須生存，就係天經地義。十年內大廈起完又拆，拆完又起，邊個去補償受害居民？近萬噸建築廢料送去堆填，過百汽車往來塞死禮頓道，又有邊個可憐？英諺講得好：「壞咗嘅鐘一日都會準兩次」。《楊》文通篇歪理，就得一句講得啱：「皇冠酒店的改建，對本區居民有百害而無一利。」既然傷害居民，灣仔社區群起反對，政府嚴詞拒絕，咁至係天經地義！

周顯又稱，楊雪盈議員並非當區議員，而自己就係跑馬地居民，所以反對酒店拆卸重建，就叫越區；豈不知沒有大坑區議員，只有灣仔區議員﹔考慮灣仔社區規劃，包括酒店所在嘅樂活區，根本就係灣仔一十三名區議員嘅份內事。

翻查地圖，酒店處於禮頓道上游，大坑則為禮頓道下流；水源受污染，下游居民就要個個噤聲？銅鑼灣人口密集，牽一髮牽動全身﹔城規會千瘡百孔，缺口一開豈止搞壞灣仔？唔止大坑一區，唔少灣仔區議員都紛紛表態反對規劃，唔少區外居民都聯署支持。為社區、為環保，喺橫洲、喺灣仔，市民互相支持，仗義發聲，呢一個「義」字，只怕係眼裡只有一個「利」字嘅人無法理解。

最令人百思不得其解嘅係，呢位專欄作者點解要用公共空間，去抨擊一位素不相識區議員，對於本區規劃嘅關心呢？可能一係：Google一下，原來呢位周生喜愛以知名議員姓名為題撰文，藉以引人注目。第二個可能係——希望唔係——某位「著名細價股炒家」，喺日前高位買入咗唔少0251，燶味纏身，唯有一邊寫文，一邊抱頭痛哭啦。


P.S. 聯署連結 ：https://goo.gl/oZd72L
地產商向城規會提交規劃申請，將禮頓道8號改劃作商廈及食肆。該申請計劃將落成僅八年的酒店拆卸，重建成商廈，將對周邊環境、交通及鄰近居民帶來重大影響。若然通過，將浪費大量建築材料，更使禮頓道交通流量超出負荷。
城規會諮詢期將於6月16日完結，請各位盡快加入聯署！

（圖片來源：Ngamgilani｜CC BY SA 3.0）