IKEA九龍灣MegaBox分店於昨晚11點至凌晨2點舉行「深宵瘋狂購物夜」，部分貨品低至一折。昨日人潮逼爆商場，以致整個九龍灣大塞車，成為了整個網絡的熱門話題。

有不少網民對於逼爆九龍灣的畫面感到驚訝，但其實又有幾出奇？星期五深夜搞破天荒商場活動，第二日又大把人放假，下星期三又假期，近幾日確實有多少假期氣氛。一個人去就免了，但如果有人吹雞去趁熱鬧，我都有興趣去望一望，就等於聖誕有人叫睇燈飾，過年一大班人去行年宵、睇煙花、掃街，沒有誰比誰高尚，屬正常聯誼活動，今次IKEA事件更加是開埠以來首次，就當去見證歷史吧。

去到目睹一個猶如淪陷的九龍灣，大家都說笑質疑警方為何沒有舉旗，相信不少在場的朋友，都有想過行先一步，危險速逃。不過大家深想一層，難得去到，又非趕時間，即時想起著名歌唱家鄭伊健的一句「如能繼續唱都必須唱下去」，就等於你等了20分鐘巴士，無理由半途而廢吧，最緊要還是第二日放假。

其實試想想MegaBox的地理環境，由九龍灣港鐵站行去都要兩、三個字，行到去都想打個卡，影幅相，絕對談不上低能，去到知瀨嘢，難道夜媽媽走咩，最多就只有變陣唱K，調頭都未必趕到尾班車啦。

至於揸車去的都是同一道理，話U-Turn就U-Turn咩，塞住喺條講唔出名的九龍灣天橋，想跳橋都無計，唯有與群眾齊齊成就創舉。

昨晚有去IKEA的朋友，相信至少可以和親朋戚友分享幾日，至於損失，並非如一班在家中食花生的朋友想像般大。你笑佢港豬，IKEA之友咪一樣會笑你毒L。