聽《大香港早晨》第379集第4節，大亨指，海龜（歸）其實只係A貨假洋鬼子。這個講法，絕對準確。我多年來同一啲海龜工作，得返嚟嘅經驗，好多海龜視野同思維都走唔出大陸。要做假洋鬼子，都只係做到A貨。

十幾年前，一個會議上，第一次領會到海龜，只是假洋鬼子A貨。

會議前，同一個海龜坐在一起。呢個海龜，响大陸B仔畢業後，到美國屎彈福讀碩士，博士。呢個CV當然令佢寸寸貢。佢同我哋講嘢，都用英語。小弟當時完全聽唔明佢講乜，只好「叭頓」又「叭頓」，然後同佢講匪語。但佢仲係堅持同我講英語，一臉輕視嘅眼神，好似話，你哋的英語真屎。

會議上，有個嚟自英國牛記的真洋鬼子，問咗幾個問題，嗰個寸寸貢嘅海龜，為咗表現自己，馬上回應問題。但係，牛記真洋鬼子完全聽唔明佢噏乜，也不停「叭頓」又「叭頓」。海龜尷尬不堪，最後要我哋香港嘅假洋鬼子補飛。

呢個海龜，只係假洋鬼子A貨，佢嘅英語問題，多數係因為佢哋學拼音長大，讀英語，很多時都以拼音方法去發音，搞到好難聽得明。冇計，除非佢哋自細响外國讀書。

海龜，通常都自豪留美或留英等，見過世面。佢哋好多時，都會用居高臨下，懶醒嘅態度同香港同事交談自己的飲鹹水經驗。但係，聽下聽下，你會發覺佢哋好似嗰啲怕咗共產黨，於是移民外國，但唔知點解，又咩心繫祖國嘅金山阿伯咁。

佢哋講嘢除咗好似金山阿伯外，思維又好似維園阿伯，例如，佢哋會話，美國基礎教院差過大陸、美國人權仲衰過大陸、美國都好唔民主，美國差人衰過大陸公安。有一次，同事結果忍唔住，質問個海龜點解走去啲咁差嘅地方留學。

不過，佢哋見到真洋鬼子，又會有唔同嘅講法喎。話說有一次會議，有洋鬼子問海龜，大陸人權係咪真係好似美國佬咁講，堅係差？海龜為咗討好真洋鬼子，拉下關係，於是如數家珍咁批評大陸，仲加鹽加醋咁話大陸點樣點樣冇得救。

好多海龜，雖然去過飲鹹水，但係佢哋好多時都心繫家鄉。就算去睇當地新聞，都係通過睇新浪呢啲大陸網站。佢哋大部分都唔去睇當地報紙，更遑論走入人哋社區，認識下人地社會，人哋嘅文化。

一次，同一個响美國名校畢業嘅海龜食自助餐。佢攞食物，好奇怪。一隻碟，擺到滿晒食物，有壽司，凍蝦，但又有燒排骨，炒雞球，冷嘅，熱嘅，放埋一齊，好一種咩中西式共冶一爐咁。

好多海龜，留學外國，除咗講兩嘴流利但發音奇特嘅英文外，實際生活上，係一個徹頭徹尾嘅大陸人，做嘅，就只可以係A貨嘅假洋鬼子。

海龜，睇起嚟，好似好放眼國際，但喺識見，就仍然走唔出大陸。

雨傘革命時期，有一個在港教書超過十年以上，教社會學嘅海龜分析香港形勢。我諗佢教得社會學，應該對香港社會有啲認識。但係佢嘅分析，就好似從來未住過香港咁。

佢首先就將雨傘革命類比六四，其中一個論點，係香港學生比北京學生處境好很多。佢話，當年北京區嘅警察，都係北京人，對住學生打唔落手。結果政府响其它地區，調動警察到北京。那些非北京戶口警察，當然對學生絕不手軟。但香港卻不同，政府點樣調動，警察都係嚟自香港，所以，香港警察係落唔到手打學生嘅。我聽咗後，實在啼笑皆非。

海龜最多只係做到A貨嘅假洋鬼子，最大問題係唔肯融入人哋社會，但又覺得自己好識人哋嘅社會、生活同文化。其實，佢哋嘅視野，永遠走唔出大陸。