熱血時報 | 偷睇對方部手機之前

偷睇對方部手機之前



偷睇對方部手機之前


自己嘅手機落入其他人手上,而對方又知道密碼,剩係幻想吓都覺得恐怖。手機就算冇閃卡,都肯定會有唔少相片、短訊、電郵、信用卡買嘢紀錄……等等,拎住一部手機已經等於睇晒一個人嘅背景。偏偏對你部名貴手機最感興趣嘅,唔係拎住雙程證嘅扒手,而係你枕邊最親密嘅另一半。

唔好以為 set 咗密碼就冇事,對方要知的話總有辦法偷睇到,我聽過有個女仔講係靠睇返佢男友部電話個芒嘅指紋而知道密碼。再者,你有冇把握每次用完手機或者電腦都記得 lock 返?當你有,可能另一半又會問:「你咁緊張做乜啊有嘢唔見得光呀?」

須知道,要偷睇另一個人嘅私隱好易,但你有冇咁嘅心理準備先?正如好多人話想去起命盤算命,我都會反問佢係唔係咩壞消息都接受到?始終大富大貴萬中無一,大部份人都係平凡勞碌終老,甚至相士同你講你兩年後會死,你又接唔接受到?接受唔到一不如慳返一千幾百,何苦貼錢買難受。唔通你會係對方嘅手機發現佢原來係汶萊皇子嚟香港體驗平民生活?

一偷睇,就有如打開咗潘多拉盒子,可惜留係盒底嘅唔係希望,而係絕望。假如你乜都搵唔到唔代表冇事,因為由你偷睇對方嘅私隱開始已經失去信任。而一失去信任,本來無關痛癢嘅一言半句都變成十惡不赦嘅罪證。

如果偷睇到男友傳短訊畀其他女人:「靚女有冇掛住我啊錫啖先!」大部份女人又唔知諗咗去邊,腦內已經上演佢哋肉帛相見嘅戲碼,殊不知所謂靚女係佢隔離屋連仔都有三個嘅陳太,男友只係一如既往打吓嘴炮食吓豆腐。可惜以後對方就算出去同朋友打場波,你都會形住佢同靚女偷食。

又或者睇到有條友傳短訊畀你女友讚佢靚、約食飯,慘在你女友又冇企硬推卻,反而扭扭擰擰想去又唔去咁。作為男人當然嬲爆,但又唔可以俾佢知道你睇過佢手機,唯有自己忍忍忍、發女友悶氣,嘈到分手都唔知為乜。

人有好奇心,好多嘢想知,但偷窺絕對唔係一個好辦法,有事當然有事,冇事都好有可能誤會成有事,明明只係同異性開玩笑,喺另一半眼中都變成彌天大罪。

劉德華果套《天機:富春山居圖》真係肉酸難睇到痺,但當中林志玲有句對白尤其精警:「男人,無知無懼。女人,無知無慮。」

感情路上,無需過份清晰。當對方清澈如一盤白開水,你對他已經瞭如指掌之際,又會懷念起當初曖昧時的迷濛。


作者
讀者回應