時值農曆七月，鬼差們都加緊巡查上年走失了的遊魂野鬼，如有發現，就把他們帶回陰曹，由判官法落這些遊魂野鬼該當何罪。

這夜，老鬼差帶著新手四處巡查，
「嗰度有個細路女喎！」新手發現到一個孤女在球場上徘徊，快步上前，想把她押回陰間，好等自己的初次任務立下良好記錄。
「後生仔始終都係差啲火候。」老鬼差懶洋洋走在新手的後面，
「你睇清楚呢間學校掛住咩牌頭先啦！」老鬼差叫住新手。
新手抬頭看到，自己見到的球場，原來是一所學校的操場，而這所學校上掛著一個大大的十字架。
「哇！好在得你叫住。」新手急忙收回手中的鎖鏈，免得自己踩過大界，河水犯了井水。
「奇怪，為什麼他們的光沒有接收這個女孩，任由她流離浪蕩⋯⋯」老鬼差出於好奇，但其實是不忍孤魂在陽間無處容身，向女孩作出慰問，「小妹妹，你為什麼還留在這裡，用你們的方法叫那道光把你接收吧！」
「光？咩嘢光，我等緊老師嚟。」
「𡃁妹你死咗㗎啦⋯⋯」新手也不忍心看到女孩的情況，想直接告訴女孩她已死這個事實，卻被老鬼差打斷。
「唔好多事，費事惹麻煩。」老鬼差也聽聞過那些人如何荒謬地處理人命攸關的事，已經心中有數。
「新仔，我地走啦，我地有我地嘅指引。」老鬼差對那些人做的事見得太多，已經視作平常。
「唔得！亡者被人誤導下令自己滯留陽間，我地有責任引領佢去正確嘅地方！」新手說得義正詞嚴。
「呢個只係我地其中一個原則，但時代唔同，上頭時時刻刻都對指引作出檢討，最新嘅指引係叫我地不得插手其他宗教嘅法則。你跟指引做，放棄正確嘅原則唔會有事，但你抱住原則而違反指引，就我同你都會有事，我就快退休輪迴，你唔好累我！」老鬼差說得青筋暴現，新手也想到自己初次行動就違反指引，會留下不良紀錄，只得無奈妥協。
臨離開前，新手向老鬼問到，「個𡃁妹最後會點？」
「好彩嘅，若干時日佢就會知道自己真係死咗，到佢記返起自己點死，啲光就會嚟接收佢㗎啦！」
「咁如果佢永遠記唔起呢？又話光會照遍大地嘅？」新手追問。
「光，得確係照遍大地，但人心嘅陰暗係會築起一道屏障去擋開光，等自己係光照唔到嘅地方作惡⋯⋯唉，講咁多做咩吖，走啦！」
新手回頭向女孩大叫，「𡃁妹！你要盡快記返自己發生咩事，等光可以帶你走呀！」
初成亡魂的女孩根本就不知道新手鬼差在說什麼，她只記著自己身亡時聽到的說話，所以只沒頭沒腦的回答，「老師同校長佢地係好人，我會一直喺度等佢地嚟幫我㗎啦！拜拜！」小女孩向新手鬼差揮手道別。
新手鬼差轉身，跟著老鬼差離開。
「聽佢咁講，佢分分鐘會化成『地縛靈』。」老鬼差說得淡然。
「光照到嘅地方會有地縛靈嘅咩？」新手不明所以，
「光？呢個地方，由人心築起嘅屏障，早就將光擋得滴水不漏。」
新手重重的嘆了一口氣
「唔使咁喎，指引無錯，我地就無錯，慢慢你就慣㗎啦！」
說罷，二人就消失在深夜的街道上。