《我的少女時代》導演話,唔想拍一部淨係畀00後、90後觀眾睇嘅戲,希望推前一個世代嘅觀眾都會入場睇,但事實係,部戲根本就係拍俾呢一班80、90年代成長嘅人睇!後生仔女入場睇年青偶像嘅話,真係會浪費晒呢套不斷狂sell 情懷嘅戲。
劇情真係老掉了牙嘅80年代愛情故事,只不過前同後加咗一段回憶少女時代嘅現代橋段,就變咗可以包裝成一個充滿《那些年》情懷嘅愛情故事。之但係,當中穿插嘅一啲細微支節,又真係足夠令到你嘅少女少男情懷標晒出嚟!
台灣係飲香港娛樂圈奶水大,就連當年嘅潮流都係跟晒香港,你就算唔鍾意華仔,身邊都一定有個瘋狂華仔粉絲,又或者係成日扮華dee嘅朋友。仲有戲中出現嗰件Boy London tee,真係一見到就已經想叫出嚟。總之劇情普通,仲要加埋鬼咁老土嘅《我的野蠻女友》式嘅回憶表白。之但係就下下都中正你嘅回憶,雖然片中所講嘅係國語,但感覺係睇緊港產片。
之不過,當真正香港拍嘅港產片,想賣情懷嗰陣仲係要sell 嗰種打風頂住屋頂嘅獅子山下精神,人地台灣就可以簡單咁拍返一個90年代愛情故事,就已經可以觸動心靈,同行嘅朋友問點解香港拍唔到咁嘅電影,或者當中橋段可以有答案,片中女主角會因為正義而喺重要關頭,公然犯校規去挑戰訓導主任,感動全個禮堂嘅同學響應,而我相信香港學生只會知道唔好挑戰權力,要聽話,甚至雨傘革命都唔好去旺角,驚俾政府點相過唔到關去深圳!
進而賀歲片都話你知示威嘅人,其實都係收錢有著數先去,又或者愛情片話你知其實想關係長久就梗係瞞住另一半玩,你就會明白,香港電影點解會沒落,點解香港點都拍唔到呢啲好簡單sell情懷,但又睇得好窩心嘅故事。
女主角喺戲入面話華仔做咩紅咗三十年都唔out,因為香港同香港人嘅光輝歲月,就係停喺華仔嘅年代囉!你見到華仔出現,真係覺得佢係星,女主角對住佢張相點癲點尖叫都係正常不過,而家就算換咗嗰個係謝霆鋒,你都會覺得威力無咁強大播……
感恩我見證過香港嘅八、九十年代,當年有明星、有美食、有潮流、有夢想、有活力,有人情味,但香港嘅輝煌同少女嘅青春一樣一去不返,而家就算要懷念我哋嘅青春時代,都要靠台灣人。
多謝台灣,保留咗香港失去嘅,不論係繁體字還是劉德華,香港人已經過咗對住鍾意嘅人會怕羞嘅世代,我哋嘅下一代,已經再唔會對住鍾意嘅人都唔敢講鍾意佢。香港文化亦已經被北方鄰國蠶食,連香港人都唔再想守護香港,只好希望台灣人繼續青澀,繼續熱血!