今日(10月16日)著名節目主持蔡康永決定摺咗台灣王牌綜藝節目《康熙來了》,呢一步行得相當明智。
《康熙》換咗製作人之後,節目由谷底反彈返少少,蔡康永趁《康熙》有返啲聲譽之時,就摺咗佢,無疑係想將《康熙》停喺美好嘅一刻,咁日後大家回憶起呢個節目嘅時候,對佢嘅評價就起碼唔會係:「《康熙》係一個做爛咗嘅節目」
對比TVB,當一個節目受歡迎,就會無所不用其極去「捧紅佢」,例如,自從「福祿壽」喺某年台慶嘅表演廣受好評之後,TVB就每年台慶都搵佢哋表演,到後來,仲做埋《荃加福祿壽》、福祿壽演唱會、劇集《荃加福祿壽探案》、電影《勁抽福祿壽》⋯⋯做到爛都唔肯收手,務求要揸到盡一盡。
TVB擁有慣性收視,做垃圾都有百幾萬人睇,所以喺佢哋眼中,唔怕做爛個節目,最怕揸唔盡個藝人嘅名氣。但相反,台灣有成一百五十幾個台,即使一個節目好受歡迎,但如果無法不斷畀到觀眾新鮮感,觀眾好快就唔想睇你。
蔡康永唔想畀個社會淘汰,所以決定喺自己個節目被觀眾淘汰之前,主動同大家講再見,咁樣大家自然會對個節目留下不捨之情,唔會淪落到個節目摺咗都無人知。
識得喺適當嘅時候斬䌫,並唔容易,而呢樣嘢,TVB一世都唔會學到。
(康熙來了截圖)