現在的年青人又串又識玩嘢又無禮貌，啲老屎忽真係無辦法溝通㗎喎：

老屎忽：「你都威咗，出咗氣，就好撤退了。」
年輕人：「你都 Kai 嘅，我係要真普選和廢除功能組別呀！Come on James，你唔好咁幼稚。做人如果為啖氣，好易激死自己。」

老屎忽：「見好就收。」
年輕人：「咁你都有車有樓，請你也要見好就收，盡快退休。」

老屎忽：「民主不能夠一步到位。」
年輕人：「你都玩咗三十年，行咗咁多『步』，民主仲要倒退了，你仲好意思出聲？」

老屎忽：「瞓街好玩咩？」
年輕人：「好過住劏房少少咁啦。」

老屎忽：「你再玩落去，你唔怕中共出解放軍？」
年輕人：「係你怕啫。我唔怕喎。到真係有解放軍，我跑得快，立刻會撤。」

老屎忽：「到出到解放軍先走，一國兩制就玩完了。」
年輕人：「一國兩制一早玩完啦！你瓷器，我瓦罐。反正現在香港都不再香港，有解放軍來香港仲好，到時睇下邊個捱唔住。」

老屎忽：「你咁諗好敗家。」
年輕人：「你尐嘢遲早都要交畀我。你現在𠱁得我開心，將來大家有著數；你現在𠱁得我唔開心，將來我送你入老人院。」

老屎忽：「香港的核心價值都畀你哋班後生仔破壞了。」
年輕人：「只顧搵食的獅子山精神 OUT 啦！現在真正的獅子山精神是『我要真普選』。」

老屎忽：「畀少少利益你嘞，退場好唔好？」
年輕人：「你留返畀自己移民用啦！我只要真普選和廢除功能組別。」

老屎忽：「你真係唔怕死？」
年輕人：「難道你未發現？90後都是8964投胎過來的，現在『我～返～嚟～搵～你～』」

（本文原載於作者面書，蒙作者答允轉載。標題為編輯另擬。）