我唔識搞咩科學技術,又唔喺咩搞創意嘅人。但係,見香港搞咗個創新科技局,想講一講我嘅一啲經驗,一啲簡單嘅睇法。
近日,某外國公司,搵咗我去參加佢哋對某些科技產業發展嘅討論,具體唔可以講,因為有合約規定。我收到邀請,有些奇怪,因為我完全唔識佢哋要研發嘅科技。經過一連串溝通後,原來佢哋想搵一啲唔喺佢哋果行嘅人,睇下對佢哋發展嘅嘢,有乜意見咁。
呢一次邀請,讓我想起十幾年前,一間跨國電訊公司搵咗一班社會學同人類學嘅人,搞咗一個探討通訊科技與社會嘅研討會。嗰一次會議,喺一個勞斯萊斯式嘅會議,因為嗰間公司實在掉咗好多錢,食嘅,住嘅,都係超班。嗰間公司,資助嘅係一班對通訊技術完全無認識嘅人,從唔識通訊技術嘅各度嚟講,哩班人只係喺度 bluffing。但係,後來我才發現,外國公司,喺R&D呢方面,通常都會係咁奇怪。
我一個搞社會學嘅朋友講我知,佢被一間通訊公司邀請咗去佢哋嘅國家,喺果度一星期,好鬼游閑咁,同一班唔係研究通訊科技嘅怪人brain storming。朋友話我知,嗰一個星期,完全係無咩系統嘅安排,大家就喺度胡說八道,講自己對通訊科技嘅睇法。
後來,我又認識一間好鬼浪漫嘅國家嘅電訊公司,佢哋有一次喺大陸搞咗一個奇怪嘅會議,用咗幾十萬,請咗大陸嘅藝術家,做展覽同研討。我從佢哋嘅職員口中得知,佢哋嘅 R&D 部門竟然有三千幾人,裏面有唔少同通訊技術嘅科研無關嘅。
反觀香港,一間龍頭通訊公司,同樣也有研究基金畀人申請,但係我上網一睇,原來佢哋最高只係畀到 2 萬蚊人請做研究。佢哋嘅理財,實在係相當審慎。唔知佢哋嘅 R&D,會唔會好似啲外國公司咁,請埋啲無謂人?我覺得機會係微乎其微,點解會咁睇呢?因為連學術界都係咁。香港嘅大學,作為研究嘅模範,都係一樣,好鬼功利。
香港嘅大學,甚少會畀巨額經費資助一啲純然與實用技術無關嘅研究。而且近年,更加係要強調科研與產業嘅關係。研究成果要標明對實質產業有無幫助,要講出係咪可以做到 knowledge transfer。簡單講,啲研究係有乜用先?無用就唔好攞錢啦。
根據呢個思維,呢個邏輯,一啲純粹科學研究,好似物理學,數學咁,係好難喺香港嘅大學生存。香港嘅大學會認為呢類研究同應用完全無直接關係。
從歐洲嘅經驗作參考,香港點會鼓勵創新嘅意念呢?創新科技,係要有生活同文化土壤去栽培。開一個創新及科技局,做得啲乜?
(圖片來源:科學園網頁)