我諗好多三十出頭嘅打工仔都同我一樣,到左年尾呢個時候總係會覺得「呢個月特別窮」。「窮」唔係因為自己洗大左,而係因為「俾人情」俾到窮。唔知點解,香港人好鐘意乜都堆埋一齊嚟做,明明有十二個月可以揀,但就係偏偏呢幾個月最多人擺酒。如果計到出年一月,我呢幾個月就飲左八單。不過,我相信三個月飲十單嘅真係大有人在。計計埋埋,真係會無左成個月人工,有時仲慘過交稅。點解?稅可以拖,但人家結婚你總唔可以叫佢遲尐先結嘛,最多封人情嗰陣大力尐寫多句「祝你同XX白頭到老」。作為一個理性嘅人,我緊係希望友人可以做到「曾經滄海難為水,除卻巫山不是雲」。萬一佢唔生性,離完再結,豈不是要俾多次人情?
早前有一位準新娘向Facebook分享自己對「人情」嘅睇法,話「要是真的給五百人情就不要來了,免造成你生活艱難」。結果呢位網友被人起底痛罵,亦有唔少人批評佢「講錢傷感情」,話一場婚禮唔應該咁計較;有啲就話佢「無咁大嗰頭戴咁大頂帽」,又要威又要戴頭盔云云。不過講真,呢位新娘子真係「衰坦白」。要知道香港呢嗰看似多元開放嘅社會,查實骨子裡非常保守陳舊。無論你信教與否,嗰嗰都話Big
Day要擇日,搵唔到好日子都唔緊要,最緊要就唔好破日。搵到好日子又要諗結婚嗰日要唔要book定攝影師同化妝師。要嘅話,要一年前開始準備,而且仲有婚紗禮服、老爺奶奶一堆人都未搞……最慘嘅係,兩公婆向呢一段時間如果因為呢尐小事而拗交,咁就麻煩嘞。當然,好多朋友話因為屋企有老人家,想大家開開心心,所以無論如何都要「大搞」。如果老人家堅持嘅話,就真係無辦法。不過,佢地當然唔清楚今時今日嘅香港「大」同「貴」係成正比,又大又靚嘅話,咁就出事嘞。
點解家下結婚會搞成咁?講嚟講去都係「要面」、「結婚唔係兩個人嘅事」諸如此類嘅理由,不過「行禮如儀」先係最致命嘅原因。如果結合嗰兩位當事人唔將婚訊好事公告天下,就會被長輩視為於禮不合,唔尊敬長輩;締結嗰兩家「唔大搞」嘅話,就會俾人笑佢地「小家」,有啲三姑八婆仲會向背後耳語話人地「唔知做咩收收埋埋,都唔知係咪搞大左」;做兄弟姊妹嗰啲仲慘,男嘅全部變左「花園餐廳」啲waiter,女嘅就要天寒地凍唔著衫周圍走。好喇!做朋友嘅去唔去都預左放低幾舊,去飲嗰啲呢?主人家一邊擔心啲嘢唔啱賓客胃口,另一邊做賓客嘅又要幻想自己去左一個奇妙嘅世界,有時明知嗰兩位新人有心結,但就做戲咁做,拍手唱歌跳舞。最後,唯有自己飲多兩杯natural
high一下。大家諗返轉頭,既然另一半可以揀,點解結婚嘅方式唔可以揀?
當我苦苦思量嘅時候,估唔到尋日梁振英先生幫我解決左呢幾個月嘅煩惱。雖然「俾人情」同「唔俾人情」係有好大嘅空間,但原來呢個空間係「不規則」的。「不規則」嘅意思係,你可以揳份《爽報》入去得,薄少少揳份《熱血時報》入去又得。最緊要嘅係面皮夠厚,向嗰利是封上面寫清楚︰「我無講過我無XX過你老婆。」香港人行禮如儀,訓醒一天都光哂,不過「689就衰到無朋友」囉。