這兩天，大概是兩天吧！雞小妹發覺黑夜很長，迷迷糊糊的，好像沒有白天，沒有活動，沒有飢餓的感覺，大概是生病吧！

四周漆黑得有點怪，大家都緊靠在一起，真的，身體靠得很緊，卻沒有溫度，應該說是越來越冰冷。偶爾聽到遠處傳來的水滴聲，回音清澈入耳，其餘的聲音都不多了。

氣力沒有了，身子顫抖着，雞小妹抬起頭望向遠方，希望找到一丁點光線，好讓自己對時間多一點肯定。日光確實對生理有莫大的影響，對情緒更有着不能言喻的作用。

終於雞小妹不耐煩地問身旁的雞嬸：「其實我哋仲要瞓幾耐架？」

雞嬸費了全身的力氣，按一按雞小妹的肩膀道：「唔好問咁多啦，其實我哋遲早都要死架啦，只可惜，仲以為可以過到蛇年，初一二先死，至少可以死得有價值一尐。」

雞小妹覺得有點不對勁：「你講緊咩呀？我想出去行吓，你跟唔跟我去？呢度好悶呀！」雞妹邊說邊支撐着身子，但總覺得腳不着地。

｢我們都係比順德嚟嗰批雞害死架。」雞嬸低著頭續：｢佢哋嚟到香港後，迫我哋要住埋一齊。點知原來佢哋有病，為左避免病菌傳染比人類，我們都要白白咁送死喇。」

雞小妹說：「但我哋係土生土長香港大，同佢哋唔同架！」

「唔同？今時今日真係唔同喇，單單舊年由順德養殖場嚟嘅，已經足足有30萬隻喇。你唔覺得你身邊多咗好多講普通話嘅雞咩？呢度遲早唔係我哋地方喇！你睇吓尐人類，佢哋都唔好得過我哋幾多咋，書又冇得讀，住又唔夠住，咩都炒貴晒，搵食又艱難，想生仔或者病左，連醫院床位都話唔夠。我哋已經好好架喇，起碼唔使做，有得食有得住，只係今次死得冇晒尊嚴啫。」

「但咁樣死法，我好唔甘心呀！我想去報仇。」雞小妹說。

雞嬸嘆氣道：「報咩嘢仇吖。佢哋都唔肯講究竟係順德邊嗰養殖場出事。去到順德，你都唔知去邊度敲門好呀！你都係慳返啖氣，早啲上橋，求神拜佛，來生都唔好嚟香港投胎好過啦！」

此時，身旁的雞群，已經一隻又一隻地列隊，起程趕上奈何橋，準備飲盲婆湯，輪迴再生。

雞小妹心仍有點不忿，跟雞嬸對望，卻欲言又止，眼見隊伍緩緩移動著，都只好乖乖地跟着隊，趕路去。


（圖片來源：Zero Hedge）