日本奈良公園除咗有東大寺、春日大社等名勝古寺之外，最出名梗係有近1200頭嘅奈良鹿啦。但原來上年已經發生超過160宗奈良鹿傷人事件。

奈良縣表示截至今年1月，過去10個月在奈良公園地區已收到164宗奈良鹿弄傷遊客的報告，比去年同期多46宗，係有紀錄以來最高。受傷遊客當中有79%係外國人，幸好大部份傷者都只係受輕傷。而外國人當中最經常遇襲嘅就係中國人，高達83%！

原來有不少遊客受傷，係因為餵鹿餅嘅時候想啲鹿慢慢食，等你可以影埋張靚相，拎住鹿餅彈出彈入左閃右避，遲遲唔俾佢食，令鹿等得不耐煩或以為你挑釁佢而發嬲攻擊。大家千祈唔好咁做喇！

近年愈來愈多外國遊客到奈良觀光，奈良縣為提醒遊客注意安全，日後打算透過智能電話發佈接觸鹿時要注意安全嘅影片，又會響奈良公園賣鹿餅嘅店舖張貼外語海報，提醒遊客。