Dear XBF,

幾年前因為屋企人反對，我被迫同上一任Chris分手。後來選擇同你一齊時，我曾經以為你會比到幸福我，令我快樂。但同你一路行落去⋯⋯Sorry，我發現我哋唔會有將來。

你成日話我好需要你，無咗你唔得。事實係咩？你阿媽煮飯難食，成日食到你肚痾，你就開始過來我屋企黐餐。開頭你都好守規矩，淨係晚餐先來。之後變本加厲，早午晚都係我煮比你食，仲喺度過埋夜！你話你屋企好亂好污糟，飯又難食，所以鐘意係我屋企訓，係嘅，岩嘅。之但係你漸漸搬埋你自己嘅雜物過來霸佔埋我屋企嘅地方，我就快無位瞓！有日我頂唔順，叫你搬返D嘢返去，你竟然答我，我哋都拍緊拖，D嘢唔洗分得咁清楚！仲有你成日係我屋企去完廁所又唔沖廁，整到周圍都係屎屎尿尿，最後又係要我清理返！我真係好＿嬲！

屋企又比埋你訓，野食又整埋比你， 而家到底係邊個無咗邊個唔得？

出街食飯睇戲話就話係AA制，財政獨立，結果又係搵我笨！我最記得有次睇戲，我話我口渴想飲水，你去7仔幫我買左支$6.0的Bonaqua。正當我準備打開樽蓋飲水嗰時，你無啦啦攤開隻手講咗兩個字﹕「比錢。」OK，Fine，你要計得咁清，我就係銀包拎左3個$2.0出來諗住比你。點知你話﹕「$6.0邊夠呀？至少都$1560啦！我行到去7仔買水比你，我都攰㗎要出力㗎！」$1560？！我有無聽錯？ 貴260倍呀DLLM！我當堂嚇咗一跳，然後得啖笑。我自己去買個過濾器filter水去飲都唔洗呢個價！但我念在你係我男友，唔想搞到咁薑，我忍，我比。

尋日你捉住我，喊哂咁問我點解唔愛你。愛呢樣野，迫都無用。倒不如你唔問下自己，點解我唔再愛你？點解你唔值得我去愛你？其實一齊咗咁耐，我都好想嘗試去愛你。但係Sorry，我無辦法。唔係我唔想愛，但係真係愛唔落⋯⋯我想要可以令我proud of 嘅男人同我一齊，然後我可以大大聲同人講我係佢嘅女人。但係你呢，成日喺街到做埋D糗野，企係你身邊我都覺得好醜，唔想認係你女朋友。你記唔記得，嗰次我同你上山頂，男人老狗喺度不停自拍仲要係Facebook check-in，好似想話比全世界知你上過山頂咁。大佬，其實上山頂好閒㗎咋，好多人一早上過，仲入埋凌霄閣同蠟像館。上一次山頂就咁high到周圍跳周圍叫，你唔醜我都覺得醜。

你對我唔好、唔champ、唔上進、自私、剩係識係我身上面搵著數。你係我見過最賤最死要面最識食軟飯但係無料又扮四條嘅男人。我已經唔係唔愛你咁簡單，而係討厭你，憎恨你。唔想再同你有任何關係。我寧願自己一個，都唔想再同你一齊。

我忍夠、受夠了。我們分手吧。以後再也不拖不欠，各行各路，讓我一個人過活，我相信會活得更好。

NOT yours,
玉蝴蝶

(圖片來源：beenfane@flickr)