尋日蘋果新聞報道有間荃灣 Band 1 英文中學，個校長係早會公開「疑似」拍拖學生名。我即時諗起《1997古惑仔之戰無不勝》，莫文蔚做 Miss，叫學生作「中學生應否談戀愛」；學生話：「個題目好娘炳啫」，1997年的莫文蔚即時改咗個題做「中學生應否發生性行為」。17年後的2014年，個社會仲有人討論「中學生應否談戀愛」，「傻的嗎？」

呢件事真係好發人深省：

• 我好記得，中二的時候，中文 Miss 叫我哋自選成語寫毛筆字，幾個同學玩野，個 Miss 收咗一大堆「絲襪奶茶」、「濃滑咖啡」、「豬柳漢堡」的作品。個 Miss 好激氣，話要罰「絲襪奶茶」作者，要貼佢啲毛筆字係壁報版，比其他同學知道，要「絲襪奶茶」個「作者」知醜。勢估唔到，「絲襪奶茶」作者比其他同學大讚「有創意，我鐘意」，成為一時無倆的新星。同樣地，今次畀人開咗名的學生，你覺得佢哋會因為比人開佢名而羞恥，「真的太天真，太傻了」，佢可能沾沾自喜，覺得自己型。2014年，個中學的校長竟然同個社會脫哂節，完全唔明白班靚仔，佢點同學生溝通呀。
  
  
• 再睇下蘋果個新聞標題，重點來啦，「Band 1 英中　公開拍拖學生名　同學：傷害自尊心」，我諗 Band 3 中學校長睇到呢段新聞，真的會恥笑呢間 Band 1 英中校長，真係「笑你 on X 怕你嬲，拍拖都要開名的話，我間中學個早會開到放學都讀唔完啲名啦。」大家係咪真係覺得讀 Band 1就唔會拍拖？Band 3 學校的老師可以好肯定話你知，拍拖對學業係冇影響架，一樣都係咁差架。
  
  
• 份「疑似」拍拖學生名單係邊到來？校長話係老師觀察出來，唔怪得話老師多嘢做啦，連「狗仔隊」都撈埋，你估啲先生做《壹周刊》咩，要發掘緋聞男女。咁同學之間係咪有線人，報串個二五仔係咪比人橫刀奪愛，所以供啲同學仔出來。如果畀人知佢做二五，佢會唔會死得好慘呀？
  
  
• 校長舉了一個例子：「中學同學因在中七時拍拖，令成績一落千丈，無法升讀大學，其女友後來意外懷孕，男生身兼兩職養家卻對兒子疏於管教，最終妻離子散。」其實只係一個普通的離婚個案，「妻離子散」呢個 term 未免太誇。校長點解唔用經典故仔，梁山伯與祝英台，個結局係「同歸於盡」，會唔會更具驚嚇力？今時今日，仲會以「我有個朋友」呢個方式來講例子，說服力其實好弱。
  
  
• 校長以《愛不合時，抱恨終身》為題叫學生唔好拍拖，話而家唔係適合的時間。呢句說話咁熟嘅，香港政府都成日同D啲市民講未係適合的時間全面普選。點解間學校同香港政府一樣，個想法同市民（學生）相差咁遠嘅。

P.S. 拍拖呢啲野，其實點阻？經理人都阻止唔到明星玩地下情啦，「你愈唔畀，佢仲更加愛到要生要死」的例子真係多不勝數，校長唔明不如睇多啲 TBB 啦，套套都係咁架。

再P.S. 再睇段新聞，校長今次個行動，事緣最近收到幾位家長投訴，指有男女學生在校外穿着校服時作不恰當行為，希望校方關注。原來今時今日，所謂的家校合作，永遠都係家長係上把，只要家長投訴得一兩次，學校就唔敢唔處理。學校又竟然會咁聽話，一叫即做野。如果香港政府有間學校咁聽話就好啦。


（本文原載於作者面書專頁）