喺sim裡面，我想做乜就做乜，永遠都無功課，想玩就玩，想睇書就睇書，想睇夠9個鐘電影又得。

返工雖然喺返消防員，唔知做乜，但點都有份糧，一定有工開。無可惡嘅上司，無好煩嘅人際關喺，更可以準時收工。唔洗擦老闆鞋，唔洗睇人面色。你話，現實邊有一份咁嘅工呀？FF少陣好啦，唉。

即使我無學歷，但我喺Sim最衰都有做消防員，有千幾蚊一日，仲成日升職，喺現實根本恨唔到。一個月可以賺$22000呀！喺香港？大學畢業都無呢個價呀！

我間屋想幾大就幾大，一開始就有間屋俾我住，最衰都一廳一房一廁所一花園，又唔洗交水電煤，真係抵到爆，擴建都唔洗幾多錢。現實我連flat都租唔起，最多都係俾得起板間房嘅租金，真係灰到爆。

拍拖、結婚、生仔，完全可以自己掌握。想同邊個拍拖就只要加佢入個game就得，一flirt就一定成功，仲可以安排佢住隔離屋，成日見都得，邊洗受 long D 之苦，邊洗怕無得見，邊洗怕佢唔知去咗邊，更加無小三嚟搶我老公，愛一世就真係愛一世。

掛住就可以見，行幾步就有得見。打電話俾佢一定聽，佢返工永遠都唔會加班，又唔會有extra野做，可以同你日日吹水，同一齊去街街。想愛愛就一定可以有得愛愛，屋企夠大，又有私穩，梗喺得嫁。啱啱先聽完個frd講話喺香港住連想愛愛都無地方。唉，都真係咁，你睇下幾多人打野戰呀。

想生仔實百發百中，可以想生幾多個就幾多個，實無生育問題，又唔洗擔心醫院無床位，又唔洗擔心奶粉問題，佢都一定大到，唔會病，唔會無啦啦死左。

入面嘅朋友永遠都係真心真意，對你好，永遠唔會出賣你。現實中，想搵個新嘅真心朋友都難。你知人言可畏，又知人心叵測，更加知道喺社會只可以信自己，你話灰唔灰機呀？想搵舊朋友，好似中學雞時代咁煲粥都好難呀。個個朋友自己都有事業、學業，仲有啲以前仲傻下傻下嘅MK仔都已經住緊公屋、結咗婚、生咗仔。而自己仲乜都無，連間公屋都排唔到，唉。

去旅行連交通費都唔洗俾，仲有地方住，多啲frd子就多幾個地方去。喺香港，我想去歐洲都係儲多幾個錢先，唉。又要供學費、養兩老、養BB，呢個夢都唔知幾時可以實現到。大學grad咗之後，最遠去過嘅只係大陸三日兩夜美食團，真係開心死。

唉，呢個遊戲玩下就算啦，咪FF咁多。無梁振英、無金錢煩惱、無上車困難、無工作壓力、無愛情煩惱嘅人生係根本無可能存在。

呢啲game，Del咗佢算，浪費曬我啲時間，最重要係佢不斷提醒我理想嘅生活到底係點。唉，睇嚟要移民去瓦努阿圖先有呢啲生活。

p.s. 我窮到連sim4都買唔起，玩著手機version先。

一個日日玩Sim嘅女人字

作者面書專頁：
http://www.facebook.com/artiutiu