近幾年，有段段子三不五時就會響大陸論壇上出現：

「1987年，菲律賓前總統訪華，在談到南沙群島的所有權時，這樣說道：『至少在地理位置上，那些島嶼離菲律賓更近。』鄧小平也毫不示弱地說了一句：『在地理上，菲律賓離中國也很近。』從此以後，南沙再無戰事。」

呢段文字，堪稱係大陸憤青「飛機文」的表表者。呢幾年來，呢段段子已經被各大討論區瘋傳過無數次，有時更會同另外幾篇飛機文一併列入「最中國的9句外交語錄」入面。每當有人轉載呢段野，大陸網民都會無比雀躍，留言力撐「鄧爺爺」，讚佢係偉人、偶像，順便諷刺當今中共政府外交上的軟弱無能。

當然，叫得做飛機文，就梗係老作架啦。事關1987年根本冇菲律賓總統訪華，一切都只係子虛烏有。有人考證過，最先提出呢個故事的帖子，係響2008年的天涯社區。當時那帖沒有提出任何來源出處。之後各大論壇紛紛轉載，尤其當中菲因黃岩島主權問題關係緊張時，呢段野更獲瘋傳，留言者力讚鄧小平有之，侮辱菲律賓有之，諷刺當今領導人亦有之，偏偏就係冇人會嘗試指出，如果段野屬實，其實鄧小平係相當失禮同霸道。

但中國網民唔會咁諗。佢哋極大部份人都覺得，鄧小平呢句「菲律賓離中國也很近」係相當有霸氣，展現強國領導人的「大國風範」。其中當然亦有好多人乘機發表侮辱菲律賓及其國人的歧視言論，在此不贅。呢種反應，好反映到而家大陸網民普遍都有種「大國要崛起」、外交上要更加強硬，「寸土必爭、半步不讓」的心態。響佢哋心目中，菲律賓、越南呢啲只係東南亞的蠻夷小國，係「老美響亞洲彖養的守門狗」，同強大的中國並非同一檔次，自然無需以平等角度看待。所以冇咩人會覺得嗰句野其實響外交上相當失禮，背後隱藏著「你老幾呀？我唔吞咗你呢個小國已經好俾面啦！」的帝國霸權心態。

而呢種帝國霸權心態，其實係「大中華統一思想」在作祟。呢種思想，先係真正的極右法西斯。所以話，在心態上，法西斯其實離中國也很近。但響香港居住的大中華左膠，往往對以上現象視若無睹，反而怪責香港人法西斯，對真正的極右法西斯卻多加迴護，甚至視佢哋為弱勢。呢啲正正咪就係佢哋左膠口中的「只拍蒼蠅，不打老虎」囉！

（圖片來源：www.aljazeera.com）