（第一回重溫：暑期工陷阱；第二回重溫：傳銷大揭秘；第三回重溫：我係咪呃緊人？我睇唔透）

 

一間傳銷公司最驚咩？無客？驚啲貨賣唔出？No no no! 最驚就係無新人入職。

講到底，向外 Sell 貨只係 Step 1，Step 2 就係向內部埋手，叫啲新仔去借錢買貨。

我哋喺尖沙咀做咗個半鐘問卷，結果我開得一張單。個過程比想像中辛苦，難捱，最難受係，我覺得自己呃緊人哋買一啲人哋根本唔需要嘅嘢。我喺度諗，有啲咩人會停低同你做問卷？有戒備心嘅人，一早掂行掂過唔 Show 你。剩低肯同你做嗰啲，一定係以為你真係做緊調查先停低，好心幫你嘅好人嚟。而最後肯買你張美容Coupon嘅人，就係嗰啲想做好心填問卷，又心軟唔想 Reject 你嘅人。講到尾，人善真係被人欺。有句話講得好啱，「不要欺騙人。因為能被你騙到的，都是信任你的人」。呢份工，正正話比我知，你要呃人買 Coupon，一定係要呃嗰啲肯信你嘅人，即係以人哋嘅信任換取自己嘅收穫。

我好相信，買咗呢張美容Coupon嘅人，十個有九個都會後悔，只有極少數係真係覺得個 Facial 係好，否則，都唔洗用呢啲招去 Sell。

上到 Office，Rachel 話：「你哋唔洗咁灰心喎。其實你哋今日開單開得少係正常㗎，始終無乜經驗吖嘛。拿，阿 Roy 同你哋一樣，上星期先入職，但係佢今日都開到5張單喇！知唔知點解？因為佢自己都試過個 Facial，咁同啲客 Sell 嘅時候就更加有說服力啦！你哋都可以買一張試下，或者幫屋企人買都得，當然 Commission 都係照計嘅，係咪好抵呢。自己唔試過又點樣叫人買呢？」

大家都半信半疑唔知買唔買，但係啲 Senior 就猛咁說服，結果我都買咗一張畀自己。

「如果每日做問卷做幾個鐘會攰死你哋㗎，所以而家我地會打電話 Sell coupon，做法同頭先差唔多。首先打畀對方，問吓佢有咩皮膚煩惱，然後向佢介紹呢個魚子 Facial。」

我心諗，咁即係等畀人Cut線啫⋯⋯邊有人會聽我地 9up 呀？

「電話 List 呢？」我身邊有一個都係中五嘅肥妹問。

「電話 List 未就係喺你哋個電話度咯！呢啲叫打 Warm call，即係打畀啲相熟嘅朋友、親人，向佢哋介紹呢個產品，個成功率會比 Cold call 高好多。你哋記住，你哋係向朋友分享呢個咁抵用嘅 Facial，向佢哋解釋個 Facial 嘅功效。呢度有張 Warm call list，你地首先將電話入面嘅 Contact 抄哂落去，寫返你朋友嘅名，同電話。比較熟嘅朋友就寫喺上面 Group A，唔太熟嘅就寫喺 Group B，然後先打 Group A 嘅電話，再打 Group B，順住打。」

我望住張 Warm call list，上面一格格有三個 Column：姓名、電話、Coupon 數目。我腦海即時浮現四個字﹕「出賣朋友」。

雖然 Rachel 無講到，但我都幾肯定寫完啲電話上去，張 Warm call list 一定係流入佢哋公司度，無得拎走，變相我將朋友嘅聯絡資料講哂畀間九唔搭八嘅公司⋯⋯

我一定唔可以咁做。

就算要我做on9仔無底薪咁 Sell 嘢，都係我自己嘅事，我自己負責返。但係要我出賣朋友，我一定唔會。

身邊嘅人開始將手機嘅 Contact 抄落張 Warm call list，有啲之前返過嘅就已經對住張List打電話（當然係用自己部手機，間公司係唔會有電話提供）。

Rachel 行緊過嚟，我張 Warm call list 依然係一片空白。

無辦法，我又淆底，唔敢走，只好拎起支筆，打開手機，然後抄啲假名假電話落張 List 度，再打電話同朋友吹下水，蒙混過去。

第二日，就無再返去間公司。

BTW，啱啱手痕 Google 個公司名，發現到今時今日都仲有人上去被呃做傳銷，仲要係被迫借錢上啲咩美容 Course，搞到未出糧已經欠債。

後來，我繼續搵緊其他工，點知都係搵中傳銷！！！！呢次係一間喺長沙灣嘅教育中心，聲稱嗰啲咩遙距課係外國大學搞嘅，香港都認可，喺佐敦上堂。然後個 Senior 問我，我會考預計自己拎幾多分。我話﹕「呃⋯⋯20幾啦。」佢臉色一沉，然後強顏歡笑：「乜咁犀利呀？」（我竟然咁都留意到佢微妙嘅表情變化，真係好犀利。）佢聽完我預計自己嘅會考分數後，就無叫我返工⋯⋯緊係啦，是但搵間差少少嘅中學都讀到中六，洗乜讀佢嗰啲遙距課程？

記住，傳銷公司唔係想叫你 Sell 貨，而係向你 Sell 貨。


（蘋果動新聞截圖）