其實香港人做乜當咗田北俊係英雄？雖然好多人憎民建聯，好想爭住打呢隻「落水狗」，但自由黨都一様係你口中邪惡的建制派。而事實上，田北俊真係有投贊成票嘗試通過政改，咁都唔係港奸？

又有人話全靠田少嘅自由黨無離開議事廰，先夠法定人數去表決政改，所以「田北俊對否決政改功勞最大」。我哋其實唔可以確定呢個係田北俊將自由黨留低嘅原因。真係作到咁大，話田北俊嘅動機係令政改被否決？咁如果所有議員在場，田少判斷泛民有人轉軚，你估佢又會否叫自由黨改投反對票？陰謀論呢樣嘢，真係點講都得。只是我們眼見的客觀事實，是以田北俊為首的自由黨因為在商界的利益而支持偽政改、假普選方案。

就係因為佢寸民建聯係豬，你就覺得佢寸得嚟「好型」，連佢嘅政治立場都唔記得？所以幾年前咁多人睇特首選舉喜歡撐隻「狼」而鬧隻「豬」囉。其實根本冇個揀得落手。覺得一個公眾人物柒咗就不理對手的政治道德，這種二元觀點就係香港人長期以來的致命盲點。一日唔改變呢樣嘢，香港注定俾啲狼咬住。港奸一有綠葉襯托你就話好，上咗位仲唔出賣你咩？

假如一個政客抽港奸水可以代表此人不是港奸，香港人的智力真係太有問題。講到尾，港人骨子裡喜歡「斯文敗類」多於「豬一般的對手」。但其實從戰略上的考慮，其實要「豬一般的對手」才是正確的選擇。否則「港豬」自己揀隻「狼」，結果係點，不是呼之欲出嗎？