最近睇龍珠超，睇到有一集，講比達要陪老婆同個仔去家庭樂，又玩過山車又食甜筒又shopping買衫咁。阿老婆莊子同個仔杜拉格斯緊係笑逐顏開幾咁開心，比達就當然係一臉故我：「無聊！你d女人真係麻Q煩」果種被屈機嘅樣。

睇下睇下，背景又加埋首死人acoustic 結他音樂，我竟然喉嚨發滾，流左兩滴馬尿出黎。

係比達嘅心裡面，佢最想就係去修行，無時無刻都要修行，佢要贏，佢要證明自己係宇宙最強。

好可惜，如今嘅自己竟然孭起左頭家，唔理你係咪管得掂一個星球，你管掂頭家先啦。

人大左，出黎社會經一事反一智，當日畢業掉完頂㡌之後明明磨拳擦掌誓要闖一片自己天空。一年、兩年、五年， 「算罷啦你」， 「或者你應該認命」。

多少次有朋友煞有介事嘅善意開解，你開始動搖，你開始質疑自己，其實，我並不是想像中咁與別不同。

你承認自己都算好努力，為著目標，不作無聊應酬，特訓特訓特訓！甚至你摸出左一道法門，可以令自己爆肌出位！呢鋪仲唔係我贏 ！你還未來得及感受自己多年黎嘅血汗成果，未來得及擔當一集的主角，你驀然就發現，你嘅勁敵一下子就做到嚕。仲同你講： 「柒少陣啦達仔！你咁樣做其實係多舊魚白走冤枉路浪費氣力，簡單d講...係嘥九氣呀！」

你不服，你啖氣難以嚥下，衝衝衝，就算死都要突圍而出，當你以為自己又再追到對手之際，佢又抓抓頭，同你講，哈哈，今次有個神仙幫喎。

僕你個街。 作為男生嘅我地都好清楚，就算成家立室，就算啤酒肚微微脹起，其實我們底蘊中，仍然是那個充滿幼維思想嘅大細路。

我們當然想如往昔般一班人打通宵winning 聯賽，仲要特登去訂製獎盃留念...

我們當然希望如往昔般一班人夾下band昅下女，隊下啤吹下水...

我們當然希望保持故我，不妥協，相信自己是宇宙第一流，只做自己想做的事。

作為男生，我們卻逐漸如比達般，背起一個又一個的包袱。

收工喇，返去喇。唔駛照顧老婆睇個仔養阿媽搵食供樓找咭數交稅咩？

比達一家人出發去旅行果下已經講得好清楚。

明明你係識飛吖，「蓬」一聲就可以去到，不過你老婆唔識吖，要坐飛機慢慢凳。咁你，等唔等吖？

你只能做一個，「超，d女人真係麻Q煩」嘅屈機樣表示左控訴，然後又繼續聽住佢依依哦哦。

同埋，今次比達之所以會去旅行，係因為佢曾經應承過佢個仔杜拉格斯：「如果能夠打中佢一拳就帶佢去遊樂場」嘅承諾兌現。

就算自尊心有幾強，做男人，一定要有膊頭。

我開始體會到，比達，真係好科。

我們哪誰， 不是生活中不折不扣嘅比達？