喺 Facebook 見到某記者貼咗張相，只係一個男仔半跪低幫個女仔綁鞋帶嘅剪影，標題為「你找到了一個願意為你綁鞋帶的人嗎？」。一睇就知此圖必火，就似平時一樣，講到男女關係就有大把痴男怨女狗衝出嚟演繹佢哋獨家嘅愛情觀。

其實題目嘅意思好顯淺，只係話搵個人肯為你咁做，冇人話要迫對方咁做。既然好多人都講到話可以為另一半連條命都唔要，但唔知點解只係幫對方綁鞋帶會咁大反應。

睇留言大部份人都會屌鳩相中個女仔公主病！殘廢！男人之恥！但當中我覺得最出奇蛋嘅算係呢個留言：「有手有腳點解要咁做？我認為下跪只可以用喺重要嘅時刻，無聊既尊嚴？你唔係殘廢到要條仔咁做呀嘛。我應該講除咗條仔做錯嘢，好似14巴港女單野咁，好難想像一個男人需要咁樣幫條女綁鞋帶，個男人咁易跪低，我覺得唔會保護到老婆。」同你一樣，我睇咗幾次都唔太明佢論點係乜，總之跪低綁鞋帶呢個動作就係錯，但好似14巴港女事件咁，做錯嘢而跪又可以接受。

周融都冇跪過你睇啦，唔通你又覺得佢係個好有尊嚴嘅男子漢？

我著短裙出街，男友見到我甩鞋帶都會主動幫我綁返，佢會仔細咁幫我綁好以防再甩，我亦會感激佢怕我俯低身而走光嘅細心。又或者下一秒，我會為佢整理移咗位嘅領呔，跟手幫佢拎兩袋重嘢怕佢太攰。一對情侶最大嘅尊嚴，並非肯唔肯跪低，而係照顧得另一半好唔好。如果彼此照顧係外人眼中叫做冇尊嚴，何不一笑置之，繼續同另一半遊樂？

真正剝奪尊嚴嘅，並唔係僅僅一個動作，而係對性別嘅定位。男人應該做粗重嘢、應該企硬、應該換燈膽、應該埋單俾錢。女人應該深居簡出、應該喊、應該煮飯、應該等老公養。情侶往往會因為性別而設定好自己嘅角色，而忘記咗做好伴侶呢個角色，因而錯過太多。例如我係女人，所以鬧完交你要主動氹返我；我係男人，就算有唔開心嘢都唔會同你講。

Come on 詹士，下次見到你嘅另一半兩隻手都拎住重嘢，就算佢覺得心甘情願，你都可以試吓主動幫佢分擔一半。唔好忘記唯有佢騰空出一隻空閒嘅手，先可以拖住你繼續餘下落嚟嘅旅程。

（圖片來源：天堂圖片網）