我住喺南區鴨脷洲，前後都27年，最憎佔領金鐘班學生同市民。

我平時出灣仔由7點上巴士，要8點15分先有得落車，剛剛呢一個有學生返學嘅星期，我如舊日日7點出門，實在太過份，竟然7點45分至55分就身處修頓球場。中間喺香隧口已無情情間封咗一下約兩分鐘，諗住灣仔晨早流流就好塞啦，開個網睇下交通現場實況，點知紅隧出入口來回暢順，堅拿道天橋充滿消失的汽車，唔怪得咁塞啦。

星期五我咪夜晚落金鐘鬧班學生囉，佢哋浪費咗我咁多寶貴時間喺茶餐廳食早餐睇《東方日報》，仲要應酬餐廳老闆娘吹足45分鐘水，搞到我電話 iPad 大量用電！鬧完班學生，星期六仲離譜，我7點15分先出門口，竟然7點42分企係喺頓球場，大佬啊，我成 Team 人9點先做野，你叫我啲生活點過，一日帶幾個外置叉電出街都唔掂啦！

而家諗落講咗成10年既地鐵仲起嚟做咩先，佔領金鐘班人搞到而家唔使起地鐵啦！紅隧香隧用咗20年塞住個南區，無啦，地鐵仲起嚟做咩？都離晒大嫂！

後記：
其實我係咪唔係住南區？點解同班議員講嘅咁大差別？點解我親身見到感受到同 CCTVB 咁大出入？