細個嗰陣，最鍾意就係落旺角襯。我係讀何文田中學嘅，一放學，就會沿住愛民村落山道行落去。我哋唔係飛仔唔係跟人乜乜乜，只係年少多好，朋友多好，唔黐家啫。

況且，MK 真係好繁華，教我哋呢啲啱啱能接觸窗外的世界嘅年輕人大開眼界。我哋會先上信和頂層睇 NBA 啪鈕褲，然後落返樓下買日劇，之後再過去好景抄 game，少男情懷總是……當然唔少得扮行過𥄫𥄫最新嘅金澤文子葵實野理封面啦。

星期五，通常都落去而家已經變咗百老滙嘅 Cybey City 機鋪玩 Daytona，廿蚊可以玩成晚，然後再坐下公園食魚肉碗仔翅咁。

跟住大個少少，同初戀同學嚟 MK 食十蚊麵、行樓上書屋、逛兆萬、行中南文具店、尼爾遜琴行。記得第一次拖佢手就係喺呢間琴行，第一次見到佢拖住第個隻手，都係呢度……

MK 呢個地方，每個角落都有許許多多我哋嘅童年回憶，我淸楚記得曾經喺呢個公園韆鞦架下嚎哭隊啤、記得約會嘅金聲戲院、記得成班一齊去剪反町隆史頭嗰間街邊髮型屋、記得第一次講夢想講到起雞皮嘅總統 band 房、記得買教科書買到差啲俾人兇嘅臨時書屋，及手工精細嘅樓梯底手繩婆婆……

而家？好日都無出 MK 喇。出到去，都唔識去邊，通街都係金舖藥房化妝品店找換店……通街都係普通話行李篋同人撞人。連想食碗港式餐蛋麵凍奶茶都唔知可以係邊度搵到。

慢慢，我哋都不得不承認，呢度，根本唔係俾我哋嚟嘅……MK，就讓它被蟲蛀掉吧。

直到直到……這幾天，我們都坐在一起，重新回到 MK，重新踏進彌敦道，景物雖變，人情卻沒變，我們，原來一直都在。香港人仍然是獅子山下同舟共濟的一群，而 MK，依舊是如此可愛，地道，滿街都是你同我。

今晚，食完飯，聽日又放假，市又唔開，iPad mini 又未炒得，子華神又睇咗，Nolan 哥新戲又未上，喂，你懂的。

MK 見！