有去過大嶼山的話，可能都會見過當地的黃牛，其中一隻於貝澳生活的黃牛叫Billy近日辭世，檢查後發現牠的胃裝滿膠袋，足足裝滿兩個垃圾桶，致腸道阻塞。

漁護署表示，Billy自小就在貝澳生活，性格溫馴，過往與其他牛牛一樣，平時於貝澳一帶草地覓食，惟直至近年，有遊客開始餵Billy食人類的食物，改變了牠的覓食習慣，之後Billy就不時走入沙灘、營地向遊客「搵食」，更將膠袋與食物產生關聯，不時摷開膠袋，誤以為有膠袋就有食物。

漁護署指，郊外生活的牛牛會自己選擇適合的植物進食，被餵不適當的食物，反而令牛牛消化不良，愈餵愈瘦，甚至會好像Billy一樣，因為腸道阻塞而死亡。

漁護署呼籲大家到郊外時，謹記「唔好餵啦」，不要愛佢變成害佢！