欠薪問題仍未解決的亞洲電視，今晚（1月23日）舉行了《萬眾同心撑亞視》的撲水義演，主打都是歌唱及舞蹈表演。無論是政界名人，抑或「友台」無綫電視的藝人，都有亮相或拍片，向亞視員工表達支持，可謂「有今生，冇來世」。

建制派人士今次都算對亞視「畀足面」，除了立法會主席曾鈺成及全國人大代表王敏剛預先拍好片段，為亞視員工打氣之外，立法會議員蔣麗芸及梁美芬更親身去到亞視的大埔廠房，向員工表達敬意，講話內容更相當精彩。蔣麗芸就表示：「無糧出仲要拎錢坐車返工，呢種精神，真係體現咗我哋香港人嘅獅子山下精神。」



至於擔任亞視節目《感動香港》評選委員的梁美芬就表示：「今年如果選《感動香港》嘅人物呢，一定係全體嘅亞視員工。」她表示如果亞視員工他日回想今天，一定會覺得自己好驕傲，是為香港傳媒史翻開光輝的一頁，因為所做的事，簡直是無人能夠相信，又指今晚的表演「冇得頂」，並認為員工的情與義是香港難求。

理應為亞視競爭對手的無綫電視及nowTV藝員，亦有在今次撲水義演中現身，當中包括TVB應屆視帝郭晉安、旗下星夢唱片歌手鄭俊弘、許廷鏗及吳若希，都為亞視員工拍下打氣片段，不過就被發現內容千篇一律，多人均表示「大家繼續努力！明天會更好！」網民亦笑指無綫表面上是有情有義，實質是貓哭老鼠，目的只是保住一個全無威脅的對手。

由於亞視聲稱今次並非一個籌款節目，故沒有設下捐款熱線，取而代之是一個「打氣熱線」，司儀朱慧珊在節目中表示，已經收到過千個祝福來電，亞視執行董事葉家寶就表示，今次廣告收入都有4、5百萬，令人動容。



（亞洲台截圖）