如果說潮流興環保，一定俾人打，因為「as a 萬物之靈，人類有責任去珍惜及愛護環境，這不是潮流是責任。」身邊總有個環保友響左近。只是不明白，既然講到「責任」如此嚴重，何解政府都不做點甚麼去遏止大家繼續生產使用同扔膠樽，反而搞回收，收膠樽然後...... 嗯...... 然後其實我不太清楚回收之後會點做。畢竟，我只是一介市民。

早年有款樽裝水以環保做賣點，推出可扭細的膠樽，為回收箱省位。之後又出植物樽（植物成份只佔兩三成），但又沒聽說品牌會用回收的膠樽再造。當時想，舊膠樽應可重用吧？不過傳聞只可重用十次八次，之後膠樽會釋出毒物影響健康。雖然我不怕死，還常常吃垃圾食物，但都不太想飲膠止渴。

曾經我很喜歡喝茶，常常買枝裝烏龍茶，無糖的，一日可以飲幾枝，得閒飲茶唔得閒都飲。不過茶賣得愈來愈貴，唉。單是飲茶食煙一日要花上百元，加上搭車食飯睇戲，自問不是大嘥鬼但肯定是大洗鬼。洗腳唔抹腳果隻。

個個都洗錢，唔通個個都想洗錢咩。坊間有連茶隔的透明水樽，大大個貌似可靠，好似幾不錯！飲晒？面皮厚過通勝的我，食飯時順道向侍應要點熱水沖茶不難，年中慳不少錢。但原來有分為玻璃製及膠製的，前者我已打爛三個，得不償失；後者總不放心，如果水太熱會溶膠怎辦？最後只好留在家中做水瓶。

肉赤過後，出糧，又一條好漢。母親大人介紹我買個容量約300ml 的日本製保溫瓶，她說這就隨時可以飲熱茶。不過當時對茶的熱情開始冷卻，轉投咖啡的懷抱，飛砂走奶的齋啡與 expresso 最得我心。由於飲咖啡前後我喜歡喝水，最理想是室溫或凍水，所以保溫瓶似乎不太合用，而且體積與重量亦不瀟洒。最後把簇新的保溫瓶送給媽媽，據知她轉送予粵曲班同學。

又繼續尋樽之路。

某日，為搜羅表弟妹的生日禮物去逛「行山舖」，總覺行山品牌的產品比較實用比較靚。在一堆雪褸天蠶衣之間遇到這個水袋，大喜！雖是膠製，但可重用，而且安全，不含BPA、BPS及phthalates。最緊要是外型OK，拿著出街不失禮。嘻嘻。最妙的是飲完可以摺埋，輕巧得難以置信，只是不耐熱，但沒所謂啦反正少飲熱水，於是買了個一公升容量日日用。後來發現 amazon 有賣，而且款式更齊，不過由於加上運費後與香港的售價相無幾（炭排放與素食一樣都是個「撩交鬧」的題目，信我），只好作罷。

就這樣，重拾帶水的習慣，同時由於香港的煙仔太貴也戒煙了，外遊時在地買包食吓就算。後知後覺如我，現在才知道有大學與政府場地不再售賣樽裝水，以鼓勵大家自己帶水。但其實我由一開始都沒有買過樽裝水。

（編按：本文刊載於熱血時報印刷版第53期。熱血時報印刷版訂閱連結：http://www.passiontimes.hk/4.0/regform.php）