今天突然轉冷，室外氣溫只得7度，街上比平時冷清。很多媽媽擔心自己的寶貝仔女冷親，替自己的BB着到成隻粽咁樣。可惜，很多媽媽和普通打工仔一樣，為了頭家，兩口子亦要出外打工。

媽媽們很細心，出門前吩咐了工人姐姐睼住妹妹，又擺低一百蚊，叫姐姐落街買餸，煲定湯等爸爸回家吃晚飯，但有一位媽媽回家後，看到妹妹的嘴唇腫了，衣領上沾有一灘血跡。家中的工人姐姐連忙解釋道，她帶妹妹去買餸時，妹妹唔小心仆親，所以撞破了嘴唇。媽媽很心痛，不停責罵工人姐姐。但爸爸回到家裡，看到小寶貝的哭臉，反過來怪責媽媽沒有好好叮囑工人睼住個女。兩公婆你一人我一句，又嘈起上來。

媽媽哭着說︰「個女你無份架？點解次次個女整親，你都怪我？」

爸爸辯解道︰「我唔係怪你，我只係擔心個女啫。你依家份工又咁辛苦，不如唔好做，多尐時間留喺屋企睼住個女啦。」

媽媽說︰「唔好做？等你養啊？我地兩公婆依家加埋先掹掹緊，個業主啱啱加租，又要出糧俾個工人，遲尐又話要送個女返學前 playgroup。唔做？你話我聽可以點？」爸爸沉默不語，去了沖涼。

去年初，政府為了 hard sell 新界東北發展規劃，拍了兩輯宣傳片，其中一輯講述一個中產家庭成功生了一個B，「有咗佢，的確係人生一大成就」。我本來對這個廣告非常反感，但回想過來，它正正道出了在689政權下中產家庭的寫照︰兩公婆份人工加埋，剛剛超出了申請公屋的入息上限，但一個唔做，又圍唔到皮；長期租樓又心有不甘，年年睼住業主㩒住搶，又儲唔到錢俾首期……不過，就要年年交稅，而個仆街政府就將「中慘」剩低嗰斗零，轉移俾一批又一批不知名的大陸移民（註︰單程證每日150個配額，其審批權不在香港一方）。

結果，睼住老婆步入三十有多，唔要BB，好驚後悔。要，又兩頭唔到岸，兩公婆惟有死慳死抵，或者同老豆老母借、同兄弟姊妹籌旗，夾硬買一層400尺都唔夠嘅樓，再將個B俾工人姐姐湊。每日個B就好像活在單親家庭裡。如果BB唔小心仆親，媽媽怪工人，爸爸怪媽媽，外母怪爸爸，外父怪外母……大家怪來怪去，好多怨氣，《金雞sss》同大家講一句︰「Why so serious? 忍一忍，就會過去。」

在眾多有B的家庭裡，只願大家唔好怪來怪去，香港搞到養個B都咁困難，你我都有責任，沒有人欠了誰，只怪香港人不夠「自愛」。為了香港的每一代，我們還可以做得更多。