呢份係今日補習學生畀我對嘅常識功課，内容大概係講點樣解決香港人口老化問題，我愈睇愈唔對路，worksheet 初段嘅問題係正正常常的，例如會問人口老化會帶嚟咩影響之類，但去到最尾居然有條古古怪怪嘅引導性問題：新移民可否紓緩人口老化問題？

如果份功課無 quote 新聞，我會覺得無問題，反而畀小朋友有思考嘅空間，但我再睇返 worksheet quote 嘅新聞（一睇就知唔係大公就文匯），講咩「增值性引入人才」，講到引入人才對香港百利無一害，我就覺得份功課好有問題。

大部份小學生做功課嘅模式都係照單執藥，睇到咩就抄落去，呢份功課有晒前設，根本就係好似閱讀理解咁做，偏偏呢份係常識科工作紙。如果係有心教，點解唔 quote 多幾份 news? 拎多幾份有唔同意見嘅 news/article 畀小朋友睇？

可能小朋友做完就算，但呢啲就係所謂的潛移默化，其實我已經唔係第一次對過啲咁嘅功課，之前有一次對過一份中文科閱讀理解嘅功課係講寫簡體字嘅好處。

睇到呢啲功課我真的好心痛，好希望做家長嘅返到屋企認真啲睇下仔女嘅功課，唔好將責任完全交係教育者身上，今日睇到個小朋友聽我講道理嘅眼神，我知佢應該都係發緊夢遊緊雲，但我都堅持要同佢講我睇到嘅嘢。

有朋友同我講：「有時有啲嘢，改變唔到現狀，就只能話畀全世界人知發生緊咩事，呢個都係我選擇做新聞工作者嘅原因之一。」

呢番説話打中我個心，我希望所有人都可以關心身邊發生嘅事，不要再冷漠。



（本文原載於作者面書，蒙作者答允轉載。）

（圖片由作者提供）