他們來到耶路撒冷、耶穌進入聖殿、趕出殿裡作買賣的人、推倒兌換銀錢之人的桌子、和賣鴿子之人的凳子。也不許人拿著器具從殿裡經過。便教訓他們說：「經上不是記著說：『我的殿必稱為萬國禱告的殿麼？你們倒使他成為賊窩了。』 」 《馬可福音》11章15－17節

大祭師：「那個叫耶穌嘅加利利鄉下佬心靈沒平安、佢個腦完全唔識得分析。有陣時唔一定要出聲嘅，無聲勝有聲。基督徒應該應學習基督咁被宰殺都默默無聲。」

耶路撒冷一個名為中立的市民：「可以嘅話我都想聖殿係一個為萬國禱告嘅地方，而唔係一個做買賣嘅地方。不過，那個耶穌咁暴力推倒人地嘅野就係唔啱。如果佢有其他和平點嘅方法爭取，我一定支持佢。」

耶路撒冷一個名為藍絲的市民：「我梗係反對啦。反對咩？我唔知啊。你知啦，世事嘅野有人支持就要有人反對嘅。」

耶路撒冷一個名為主流的市民：「阻人衣食猶如殺人父母。我做零售業的，最緊要唔好影響到我。唉，總之咪搞咁多野阻住我返工。標準工時？24小時每日？無所謂啦，而家都差唔多。」

經濟學者：「潔淨聖殿我亂計都計到每日會令耶路撤冷至少損失3500億。點計？Who cares？潔淨聖殿仲可能會引發股災，樓價下跌。我仲諗緊要唔要加埋會令伊波拉蔓延得更快。」

權威人士：「潔淨聖殿發生後零售數據疲弱，交投淡靜，聖殿仲直頭無生意做。耶穌嘅行為令旅客降低耶路撒冷喺旅客心目中嘅地位。本月起，自由行人數激減，影響估計會陸續浮現。耶路撤冷嘅國際形象正逐漸受到威脅。」

耶路撒冷聖殿附近居民：「之前聖殿仲有人做生意時，日日都有好多牲畜鴿子經過，我哋成日都會被牲畜撞到，總之好影響我哋附近居民生活。聖殿嘅物品仲要炒到貴晒。唉，投訴都無人理。殿明明係萬國禱告嘅殿，我哋都係想正常禱告啫。而家，多得耶穌還我正常生活啦。」

耶路撒冷行會成員：「由於耶穌不許人拿著器具從殿裡經過，而另外兩條路嘅人流量已經飽和，我哋剛剛通過興建第三條跑步徑，簡稱『三跑』，特色係准許大白象通過。雖然實際問題完全無可能解決，不過造價只不過低至1415億。雖然每人都要出好多錢，不過信我，有你哋著數。」

兵丁長官：「我哋嘅兵丁唔會拉耶穌去暗角戲弄。紫袍？荊棘？點會呢？所有野都係最低武力。我出名盡心盡力，耶路撤冷行政長官近日仲話感謝我。大家相信我，所有事情都已經係正常程序之中。其實都係過咗一百六十日左右，大家畀多少少耐性。」

耶路撒冷行政長官：「我哋將會成立『拜拜耶穌委員會』。並唔係惡搞，因為佢好似想成為猶太人嘅王。一個連枕頭嘅地方都無嘅人可以做出咁多野，絕對有理由相信佢有外國勢力支援。有可靠消息指耶穌叫人跟從佢，仲話咩先求佢嘅國。除掉這種令本土意識抬頭、隨時獨立建國嘅恐怖份子係重中之重。凱撒萬歲！」

耶穌在死後三天復活。激到復活。

English version is also available：http://hkcolumn.blogspot.hk/2015/03/kwok-if-jesus-was-born-in-this-day-and.html