阿臣叫了個羊腩煲和大青島等葉森來晚飯，這家叫「大中華」的餐館在長沙灣相當有名，每天都排長龍，烤乳豬，羊腩煲等都相當出色，取這樣的名字，究竟是因為老闆是大中華膠，還是想表達餐廳提供大江南北的小菜那就不得而知，不過阿臣倒是每個月都會去。

「本土派嚟大中華，膠左啲喔，阿臣。」葉森風塵僕僕剛從上海回來便直接找阿臣。

「唔好搞爛gag，點呀上海，我好耐無去啦。」阿臣最近的job 都很本土。

「飲飲食食咁啦，同啲台灣幫食咗幾餐飯，吹下最新形勢。」葉森以前在廣告公司時候，認識很多台灣人，台灣幫在大陸的廣告行業可以說是呼風喚雨，4As 裡頭不少高層是台灣廣告佬。台灣本土有幾十個電視臺，大量電視節目、廣告，培育了不少人才，語言溝通在大陸不是問題，加上這幾年大陸的薪酬已經追上台灣，有些行業更是已經超過了，所以不少外國及大陸公司都喜歡請台灣人，反而越來越多香港人給取締。

「反服貿？係大陸果啲台灣幫點會支持呀？佢地都融入大陸啦。」阿臣公司在大陸也有不少台灣同事。

「咁你就錯晒喇！佢地成班都好支持反服貿，佢地身處大陸，充分感受到大陸企業嘅競爭力同埋主要係財力，如果陸企進駐台灣，必定殺到片甲不留，台灣本土企業要進攻大陸唔係唔得，畢竟他們比香港更能融入大陸嘅商業文化，但一定唔係中小企囉，咁如果只係對大企業有好處，入得去嘅，一早入咗啦！入唔到嘅你畀咩政策都入唔倒架啦，入到去都輸死。」

「在商言商佢地唔支持，政治上就更加唔支持，佢地打工嗰班係大陸做嘢，生活，主要係揾錢，都唔會係度過世，揾夠喇，咪返屋企享受民主空氣，享受價廉物美嘅生活水平；如果到有日要翻去嘅時候，台灣唔好話統一咗咁極端，畀人統戰咗，殖民咗，好似香港咁，咁唔返好過返啦。」

「你識嗰班係咁啫，我好多台灣同事都支持服貿，佢哋都覺得台灣一早畀大陸掏空，反正台灣人一早都投資晒係大陸，起樓，做廠嘅，台灣資本投入係本身城市建設一定畀投係大陸嘅少啦。所以佢哋都覺得有咗服貿，起碼多返啲大陸資金入嚟balance 返。」阿臣提出另一啲意見。

「哎，其實有又死無又死，一日有啲生意人控制資源，有既得利益者在位，有所謂重視經濟發展嘅政府，就遲早死，台灣嘅情況唔係咁樂觀。大陸係香港用嘅經濟武器，唔好話台灣，歐美都頂唔住。」葉森感歎的說。

「台灣很多年輕人已經走出以錢作為成功目標嘅價值觀，佢哋追求自由，追求不同嘅生活方式，老一輩嘅我唔敢講，但講新世代台灣充滿希望，大陸嘅經濟武器，只能夠係香港work 架啫，港豬畀人話經濟動物咁多年，笨唔係浪得虛名架。」阿臣對台灣比葉森樂觀，對自己的香港倒是悲觀得很。

（原文刊於第十八期《熱血時報》，於2014年4月27日免費派發。 請支持文化抗共，訂閱《熱血時報》：http://www.passiontimes.hk/?view=regform）

（圖片來源：反黑箱服貿協議）