是咁的，話咁快又一個學年，差唔多又到咗搵暑期工嘅時間。不過，今年嘅我有啲唔同。搵嘅唔係暑期工，而係人生第一份 Full-time……
唉屌！唔講呢啲咁沉重嘅話題。搵工咋嘛，其實唔難，Full-time 又好，Part-time 又好，未又係去地鐵站拎份招職定唔知 Recruit（都唔明點解佢死都唔整返個中文名？係都懶型咁叫 Recruit，擺明崇洋媚外！）。或者上 JobsDB 呢啲求職網站鳩 search 一啲覺得自己條件符合到個 requirement 嘅工，然後鳩 apply，到底自己想唔想做嗰份工已經係其次。呢個年代，連搵幼稚園都要報十間啦，搵工都一樣。明明都係搵一份工啫，但個個人都漁翁撒網咁 send 百幾二百封 e-mail 出去先再諗……
而我嘅第一份工，亦係咁樣搵返嚟。
呀差啲唔記得講，呢幾年，我都做過差唔多十份 part-time，可以做嘅我都做過，除咗援交（大家可以著返條褲啦，唔好凍親）。而呢個連載就係講小妹嘅打工經歷，真人真事改編。當然，有啲位係會有誇張成份。咁到底幾成真，幾成假呢──重要嗎？最緊要睇得開心～
講返我第一份工先。
想當年，仲係一個有會考嘅年代。嗱，唔係好耐之前嘅事㗎咋！我都係接近末代會考生嗰批九十後嚟㗎！當時嘅我，同而家嘅我一樣，非常沉迷日本動漫，受日本文化熏陶，覺得身為一個青春無敵嘅高中生，半工讀賺錢交自己份學費，真係好型！如果你有睇《百變小櫻》，應該記得小櫻個阿哥桃矢同時有好多份 part-time，雖然佢唔係為咗賺錢，而係為咗保護小櫻……（我都想要一個咁 caring 嘅阿哥啊～嗚呀！）除咗小櫻個阿哥，仲有《虎與龍》嘅櫛枝実乃梨，又係一個打好多工嘅高中生。仲有《旋風管家》嘅打工管家、《學生會長是女僕！》嘅打工女僕、當然不得不提《打工吧！魔王大人》呢套輕小說！
Sorry sorry，毒
傻啦！屋企人點會畀我咁做？一般香港父母都唔會畀仔女喺讀中學時期返 part-time，佢哋一定會苦口婆心咁話：「讀好啲書，唔洗做侍應咁辛苦，第時做醫生律師！」或者好撚擔心就嚟喊咁嘅款﹕「係咪唔夠錢洗呀？我畀多啲零用錢你呀！你唔好去援交呀……」佢哋點會明白，打工嘅真正意義，在於話畀全世界知──
我終於獨立啦！！！！！！！
我唔知大家記唔記得第一次靠自己雙手賺錢嗰種感動。或者嗰度只係好少好少好少錢，少到連而家買個 lunch 都未必夠，但係你第一次感覺自己踏足咗成人嘅世界，唔再係淨係識靠屋企嘅廢物，唔係一個讀書機器，唔係一個為咗考試而生存嘅學生，而係一個活生生嘅人！你覺得自己終於屬於呢個社會嘅一份子，你睇到自己嘅將來透過一絲光芒，你知道你自己唔會一無是處！
如果你唔明白獨立有乜好興奮，你可以試想像下香港終於脫離中共嘅統治。也許，前路會令人迷惘而無助，但係至少你獨立了，你對於自己要走嘅路有話事權了！
所以我一向好贊成未咁快考公開試嘅高中生搵 part-time，去外面個世界見識下。反正讀唔成書嘅都係會讀唔成書，讀到書嗰啲亦有辦法搞得掂，最多淨係返星期五六日。就算真係影響到讀書，我相信打工嘅得著係超過校內成績退步嘅影響。
當然，我阿媽係唔會咁開明。佢係絕對唔會畀我半工讀。
我中四嗰年，身邊有啲同學去M記做 part-time，有啲男同學仲勁，中三就去啲貨倉運貨，即做即 pay，特別好搵。不過，佢哋屋企人都強烈反對，仲搞到要學校老師勸告，叫佢哋辭職唔好做，專心讀書。
而我屋企人眼中我一向都係一個聽話嘅乖乖女，所以我都唔敢向我屋企人提出話想半工讀。結果，要等我中五考完個會考，我先搵暑期工。
我人生第一份工，好．撚．伏。
噢再一次 Sorry，個標題呃咗大家入嚟，千幾字仲未講個陷阱係乜。下次講。
（續）
（本欄逢星期四刊出）