講波佬經常話「好彩個龍門冇恰眼瞓」，但假如守門員不集中精神棄關飲水，更要搞到失波，又難怪會被人質疑打假波。

於昨日（5月24日）遼寧宏遠主場對重慶力帆的一場中國超級聯賽，就發生了匪夷所思一幕，當比賽戰至下半場84分鐘，當時落後0:1的宏遠於禁區外搏得罰球，丁海峰接應隊友開出的快開罰球，將皮球送入空門，為何會是空門？原來力帆門將隋維杰居然企在門柱旁飲水，目送皮球入網，最後雙方打成1:1。

翻查紀錄，隋維杰曾經於香港搵食，效力過四海流浪。在2010年，香港廉政公署曾採取「季候風」行動反假波，並拘捕多名球員，隋維杰亦曾被帶返ICAC，但最後因證據不足而獲釋。

（中超片段截圖）