未打先輸,有用咩?

未打先輸,有用咩?



有一批香港人,好鍾意講到香港咩都無,你哋點反抗都無用。到人哋問佢「咁你覺得點做先好吖?」就會以毫無行動自居:「我討厭政治」、「香港都冇得救啦,我會去移民」之類。而且問題係佢大大聲表明唔做不特止,仲會極力阻止你做、喺旁邊食住花生恥笑你「鳩做」、甚至不問成敗就會話你太暴力,一句「暴民」總結,然後仲要自己標榜自己咩都唔做、坐埋一邊就最明智。

依類人背後嘅心態係咩?未行動就覺得輸梗,覺得香港人做乜都輸。未打先輸,仲主動棄權,當然輸硬啦。

你講反共,佢哋就講:「你鬥得過中共咩?」

你去抗爭,佢哋就話:「你抗爭有成果咩?」

好嘞,到你上網呼籲喇,佢哋又講:「你除咗喺facebook打幾句做鍵盤戰士,仲做到咩?」

殊不知香港就係靠這類行動者去拉倒、拖延這些惡法惡策:自廿三條惡法,到現在東北發展計劃,如果沒有人作出行動反抗,這些統統都一早通過了。

唔做過,就一定唔會成功。

據理力爭,也總比坐以待斃好。

真正有助行動嘅人係會喺你做錯方向嘅時候,提供另一個做法;喺你做錯方法嘅時候,會同你講戰術策略,點樣做先會成功;而唔係擺出一副垂死狀態,坐喺度話:「香港無得救㗎啦,等畀中共接收啦」。依類人喺政治上已經擺出咗等死狀態,就算你諗住同佢逃出生天,佢都只會喺後面拉你後腿想你陪葬。

香港人好鍾意未打先輸。有啲人覺得自己係零,就連埋香港都覺得係零。將事情講到了無希望,但又唔會用盡自己方法去改變:我會稱呼為「港零」:諗嘅係零、做嘅係零,最後結果當然係零啦,依類人註定叫天不應,叫地不靈,最後成為「永遠的零」。


讀者回應