《明報》引述中國外交部表示，擬於下周國務院總理李克強出訪英國時，與英國簽訂成果文件，作為《中英聯合聲明》簽訂三十年的肯定。此行能否成事仍有變數，還得看英女王會否向中國的無禮要脅低頭，破例接見李克強。然而不論雙方會面能否成事，英國在龐大的對華貿易巿場和香港兩者之間的取捨，心水清的香港人早就心裡有數。其實，英國簽不簽份成果文件都無所謂，棺材香燭金銀衣紙喃嘸佬一早準備好哂，都唔爭果幾口棺材釘啦，係咪？

不過對香港人黎講，幾口棺材釘 do make a difference。無辦法，香港人的水平，大抵就係去到被棺材釘釘蓋先知道大難臨頭既水平。好多人直到北京發表《一國兩制白皮書》先至如夢初醒，估唔到共產黨真係夠膽撕毀國際條約。當然，唔好怪呢啲香港人，你們有誰不是喝 CCTVB 那些畫公仔畫出腸的肥皂劇的奶水大的呢，沒有誰比誰更高尚嘛。

既然香港會關心政治的人水平尚且不過爾爾，也就不難想像為何到今日還有一批人對英國抱有不切實際的期望，幻想英國殖民政府終有一日會戰勝歸來，重新收回香港。就當《中英聯合聲明》簽字當年你仲未出世，就算你認為當年香港「被回歸」責任全在民主回歸派大中華膠作祟，咁以下呢幾樣你又點解釋？

一︰十幾年來英國出既「香港半年報告書」年年都好似 Copy and Paste 咁，一味歌頌一國兩制運作良好，無視香港自治情況越黎越差﹔

二︰西方媒體，以英國黎講，最有影響力既BBC，長期係港中衝突中採取偏幫大陸人既立場（詳情請睇分析外媒報道香港手法），譴責香港人影大陸人屙屎屙尿相係歧視法西斯。唔幫香港人不特止，仲踩多一腳﹔

三︰中共發表《一國兩制白皮書》，口口聲聲對香港有「全面管治權」，一副要撕毀《中英聯合聲明》的架勢，但作為簽字國的英國噤若寒蟬，被網民催促回應後只發表一篇官樣文章回應了事。

由以上蛛絲馬跡可知，一九八四年的香港，就係一九三八年《慕尼黑協定》下的捷克斯洛伐克。

一九三八年的英國首相張伯倫，慷捷克斯洛伐克之慨，在捷克斯洛伐克代表的缺席下，與希特拉在慕尼黑簽訂城下之盟，逼迫捷克政府將蘇台德地區割讓予德國，幻想以此遏止希特拉擴張的野心。豈料納粹德國食言吞併整個捷克，翌年再入侵波蘭，導致二戰爆發。張伯倫心目中的和平並沒有實現。

英國在香港事務上面對中共，一如面對希特拉，一味綏靖退讓。當時唔係無香港人想為自己發聲，但都不得要領，談判桌上從來無香港代表。中共和希特拉的共通點，就係耍賴，講過唔算數，毀約當食生菜，有嚴重受害者情結，無視國際社會秩序同契約精神。

曾經大英帝國給人的印象，並不是如此怯懦窩囊的。英法聯軍之役時，清朝皇帝及其臣下想耍賴玩小聰明拖延《天津條約》換約的外國使節，英國人二話不說直驅北京，火燒圓明園。當時西方人對中國人的評價︰愚蠢、自作聰明、毫無榮譽感，這堆評價直到今日依然適用。反而英國人面對野蠻對手的技巧，卻似乎隨著國力一路在退化。

香港人，自己的家園只能自己救。別人無義務，亦無責任幫你去救。天助自助者，自助人恆助之。香港人唔想再畀人賣來賣去，自己作主，自己話事，自有天助，自有人助。

英國簽下成果文件對香港的唯一好處係︰令歸英派死心，丟掉幻想，準備鬥爭。

P.S. 寫到文末，睇到主場新聞引述泰晤士報話英女皇會破例接見李克強。英國國威淪落至此，吾等實不欲觀之矣。

（圖片來源：Radio Free Europe）