世界盃開波以來，其中一個直播平台「Now E」接連甩轆，昨日（6月23日）比利時對突尼西亞的比賽期間，有用戶都投訴畫面不暢順，最終尾場德國對瑞典的賽事，又要賣大包安排在ViuTV 99台免費直播。
「Now E」今日（6月24日）又發出通告，對球迷昨晚未能盡情觀看比賽感到抱歉，並指經過不同部門同事連夜不斷的努力研究，相信已經找到解決辦法。
聲明提到已經更新了系統，並努力測試中，並呼籲客戶今午一齊開「Now E」參與壓力測試，確認系統更改後效果。
雖然不少球迷都期望「Now E」死機，令賽事可以再一次安排在免費頻道直播，但亦都有付費的NowTV用戶對賽事再三免費播出感到不滿，有網民留言稱「唔好再擺99台唔該，好多冇買pass既扮有買既人係度留言想執死雞」。