好耐冇食過劣食，所以一直冇新食評出，但唔代表我忘記咗佢！

今次屎忽痕，經過銅鑼灣皇室堡，記得嗰度好似有間雪糕店好多怪款式！於是，本小姐膽粗粗衝咗入去。

Ice cream gallery 個環境幾舒服，又少人又靜（老闆哭了）。雪糕櫃又高又大，好似我呢亭毒撚可以慢慢研究，唔使驚畀店員白眼。

我以為之前喺雜誌見到龍蝦雪糕已經好癲，點知佢仲有薑醋蛋、咕嚕蝦餛飩、火腿芝士同白粥油炸鬼味（大驚）。



其實我完全幻想唔到可以係乜味，由其是龍蝦，我平時都冇乜機會食，佢陣味喺我記憶中好模糊，好模糊......

最後我點咗龍蝦雪糕，但我 miss 咗最重要的一件事....我冇睇價錢。



店員姐姐拎咗我張100蚊之後，找返50蚊畀我。咁我諗，杯雪糕起碼有蜂巢雪糕咁大杯咁豪華又可愛丫。但我冇諗過，呢杯（或者應該叫粒）賣50蚊嘅龍蝦雪糕係大概兩個5蚊銀咁細粒。之但係，店員姐姐拎比我嗰時，我好冷靜咁完美掩飾咗我嘅驚慌。



埋位之後，我鼓起勇氣筆咗一啖入口。點形容好呢，唔係鹹，唔係甜，唔係酸。但食落有一陣龍蝦殻嘅臭味，而且雪糕上面仲有微量龍蝦肉。

呢杯龍蝦雪糕本身係法式雪糕，食材係龍蝦，每五百克龍蝦只能製作五百毫升雪糕。我亦好慶幸佢咁細杯，因為真係幾難食，好彩幾啖食晒。下次一定要試吓油炸鬼白粥雪糕！