WhatsApp、Facebook等實時聊天工具，方便了朋友之間的溝通，隨著群組出現，表面上你一言、我一語好不熱鬧，但開工打仗時勁多無聊訊息，不斷彈出來的提示實在令人心煩。可幸有得校靜音，一 Mute，WhatsApp 可以靜音一世紀，Facebook 亦可「Until you turn it back on」，得閒先睇，或者直頭唔睇，爽曬。

三姑六婆親戚的、講某某是非的、中同的、Group Project 的、某次生日飯的，漸漸你會發覺，得閒的人太多，多少煩膠早一句早晨，午一個「搞笑圖片」（但將軍我笑點高唔識笑），晚一篇「震驚十三億人」新聞（Old news is so 唔識串，或是是呃呀婆假新聞），甚至乎看到一個 Emoji，又另一個跟隊，洗完版之後，大家談過甚麼？有內容有營養的對話寥寥可數看著看著，只覺群組煩厭，唔好怪我 Mute Group 嘛。

Mute 吓一個，Mute 吓又多一個，一個手機過百群組中，沒有靜音的只剩下三兩個，然後發覺，原來好多香港人，真的語言無味。無他，莫講三日不讀書，幾多人三個月都睇唔到一本（我自首），就算以往，每年香港都有一次趁熱鬧講書：書展，今年？話題只剩下幾歲的 Celine 同五十路羅琳寫真，有字嘅書反而成不了熱話。

你可能問，不如唔用 WhatsApp，或者成部機校淨音？當然不可能，公司同事開群組傾嘢，唔覆唔得；網上唔傳得閃卡，就靠「朋友」WhatsApp 私下傳閱，有些群組，還是有做 CD-ROM（唯讀不寫）的必要。

約食飯咪會睇唔到或覆得慢？是的，但有心約的朋友，總會打電話，或另外個人訊息撈上水面。

當然他們會問：「將軍，點解拋埋西瓜Emoji都唔見你覆嘅？」

我好想答下面一段：

「曾經有一個廢噏無極限的群組係我手機，但是我次次Notifications 都睇，睇完發覺無意義才後悔莫及，塵世間最浪費生命的事莫過於此。如果上天可以給我個機會再來一次的話，我會張呢個群組校靜音，如果非要在靜音加上一個期限，我希望是一世紀。」

延伸：
為WhatsApp錄音講兩句 
WhatsApp 消失的頭像