最近 TVB 鋪天蓋地宣傳處境劇《我們的天空》，單睇廣告離遠都嗅到維穩味濃──硬 sell 中港融合，「包容吓啦」、「本是同根生，何必打毒針」等金句齊出，睇嚟已經擺明車馬要觀眾硬食呢套「維穩核心價值」。其中第二集《同根生》更是力講中港矛盾、新移民來港嘅艱辛經歷，大概係整個維穩宣傳的「主菜」。

相信諸位睇完都慶過火屎──而正當你想爆粗狂媽叉班 TVB 製作群祖宗十八代通通落地獄──播放時段卻偏偏係星期日晚合家歡時段，成屋人齊齊整整坐係梳化，早幾日已經表態聲援「反佔中」嘅老豆老母仲要開始有嘢講。

唔想家變，咁可以點？（或者已經吵咗一獲﹖唔驚，如果你無因此搬出去住，都仲有十幾個禮拜你受。）

首先，冷靜，深呼吸。行走江湖，最忌心浮氣燥；沉唔住氣，輸咗頭家，值得咩？

如果有細心咀嚼過《同根生》呢個單元，都應該 feel 到套嘢處處陰招，個個位都綿裡放毒針，務求要將港人塑造成不講道理的野蠻人。此劇表面效果是宣揚共融、平息中港矛盾；實際上是挑動不同立場的矛盾，建立稻草人讓雙方立場為此爭吵不休，藉此製造話題。其心之毒，實在不可不防。

所以諸君：嬲係正常，但如果發火就輸了。而本文正是旨在轉換角度，提供觀點比各位看倌調整一下心態，建立「講道理」嘅形象。

然後，要向家人解毒，先要解構故事（詳細內容在此不贅，請參熱血編輯部及作者們的文章）：TVB 劇集往往都離不開方程式，而處境劇則離不開幾道板斧，以下歸納為四部曲：出身寒微、受盡委屈、主角發憤、排除萬難，亦即係「起、承、轉、合」。

首先講「起」，故事背景。基本上，此劇都係以八九十年代時興嘅劇做藍本：獅子山下精神、生活逼人、遭受白眼、慘被冤枉、岐視、塑造主角成為受害者。

但事實上係點？唔使講咁多嘅，你俾佢睇厚多士阿姐發爛渣段片就得。

呢個時候，老媽子應該會話呢件係「個別事件」。

咁就係時候講「承」，受盡委屈？到底大陸人係咪真係咁冤枉呢？

就攞套劇以拖喼水貨客個 case 做例子：其實睇到無線有心誤導話香港人將水貨客同新移民話題混為一談。呢個時候好應該借力打力，單單將水貨客嘅問題劃分，集中討論大陸人運水貨所帶嚟嘅問題。我相信無人能夠否認運水貨對香港環境、形象同社區嘅損害，如果能成功引導話題討論水貨客之害，搞到成街金舖藥房，我諗基本上都足以引起公憤。

之後故事一「轉」，講到「主角發憤」，老一輩好興講「人地咁勤力，咁都要趕絕人呀﹖」

其實面對好人好事，我係唔建議以硬碰硬嘅──其實唔知有無人睇到，就係呢套劇都有多次主張：新移民需要入鄉隨俗。而面對一些不規舉嘅大陸人（比如隨地吐痰），套劇都係鼓勵港人要勸戒他們此等行為。遇到類似可遇不可求嘅情節，都應該抓緊重點：「上進都要守規舉架喎﹗」以理服人，大愛包容都要讓路。

最後就係「合」啦，不過係結論「中港融合」嗰個「合」。

劇中講「山茶花」一段大概都夠賺人熱淚：「苦盡甘來」囉，細路女可以喺香港讀書囉。呢個時候，你好應該補一句「咁慘，點解一開始唔返大陸嘅﹖」

呢個世紀謎團佢一時應該答唔到你，可能要喺無嫌綫做過編劇嘅朋友先答到。

到時，你可以將問題再作無限延伸：

「其實香港地少人多、樓價高企，又成日有人青事。竟然都仲要堅持留低？呢度有金執咩？」

「我識人娶咗個大陸老婆都叫佢哋返上去住啦！香港好危險！」

（《同根生》截圖）