今次要帶班想選學生會嘅學生去 camp 做 training，尋晚開飯嗰陣我都醒嫁喇，企定大飯碗教佢哋點樣裝飯（因為實有啲人未裝過飯，上年有啲小朋友裝到碗一半地一半，無計啦，屋企唔教咪阿 sir 教囉），點知去到最尾有個女仔唔肯自己裝飯，話極唔聽，佢話阿媽教落裝飯係工人做唔係自己做喎。

本來諗住叫佢班主任打去同佢阿媽講，但佢嗰枱有學生話唔用公筷，又有個小朋友用自己隻匙食羹完飯用嚟潷湯飲，情況混亂，又係我做烈士時間。

我：你好，xxx 中學戴 sir，小朋友咪入咗 camp 嘅
媽：係丫阿 sir，點丫而家食飯時間喎，係咪啲飯餸唔啱佢胃口，係嘅話我可以 call 外賣去你度喎，佢鍾意食傻蛋漢堡丫
（傻蛋嗎丫唔係傻的嗎？）

我：唔係呢樣野
媽：阿 sir 如果佢唔食飯真係要叫外賣丫，佢無帶杯麵入去丫，因為個袋擺咗塞滿晒訓覺攬嗰啲公仔　

我：飯餸 ok 嘅放心，我想講呢小朋友係想選學生會所以入 camp 接受訓練，有樣野媽咪你之前教落佢，係屋企食飯就工人幫手裝飯，可唔可以暫時擱置呢個做法呢？
媽：當然可以啦，去 camp 冇工人嫁嘛，叫校工囉

我：冇校工嫁喎呢度
媽：飯堂職員呢？

我：佢哋唔會做呢啲野
媽：咁其他同學仔呢？俾啲男仔幫我女裝飯佢哋執到啦

我：其實。。。
媽：係喎嗰班友有幾個毒男勁多暗瘡，陣間傳染我女，都係唔好，阿 sir 你嚟啦。
（我想答我都有暗瘡丫，全場老師學生飯堂職員都有暗瘡睇你點覆，啱啱佢班主任過咗嚟示意話等佢接番嚟講）

其他同事都知呢件事

同事：我認為由佢個女食餸唔食飯，佢餓起上嚟自然會去裝飯啦。中四升中五仲咁公主病真係要教訓下！
班主任：想俾人投訴餓親個小朋友咩？又唔係你做班主任你真口響。

食完飯之後，學生要執番啲碗碗碟碟去啲車仔度，當然嗰位妹妹又係撬埋雙手~