英超開鑼，多支強隊先後登場，上季第4名的利物浦作客慘遭屈福特逼和3:3，而鬧兵荒的車路士就更大鑊，先後有兩名球員被逐，主場以2:3不敵般尼。

季初鬧兵荒的車路士，今場迎戰般尼，開波僅14分鐘就由隊長加利卡希爾領紅被逐，隨後被般尼連入3球，雖然後備入替的莫拉達助車仔破蛋，但之後車路士再有法比加斯被逐，末段大衛雷斯縱使再入一球，最終仍以2:3慘負般尼，恐怕領隊干地有必要緊急增兵。

至於季前大肆擴軍的愛華頓，今晚主場迎戰史篤城，朗尼回巢「拖肥糖」後首場聯賽即入波，於臨完半場前接應右路傳中球頂入，為母會全取3分。

今晚頭場賽事，屈福特主場迎戰利物浦，8分鐘主隊就由奧卡卡先開紀錄，雖然紅軍由沙迪奧文尼於29分鐘扳平，但旋即被屈福特再取得領先。利物浦雖然在換邊後連入兩球反超前，惟屈福特在臨完場前有越位嫌疑的比圖斯頂入，最終兩軍打成3:3平手。

其他賽事方面，升班馬哈特斯菲爾德為大家帶來驚喜，作客以3:0大勝水晶宮，西布朗1球小勝般尼茅夫，修咸頓與史雲斯互交白卷。


（直播片段截圖）