熱血時報 | 劉馬車對偽善港人批判奇準

劉馬車對偽善港人批判奇準



劉馬車對偽善港人批判奇準



先前從來唔留意網絡紅人劉馬車,皆因我真係覺得佢精神有問題(有睇佢以前啲片就知),但今次好似鬼掩眼咁,睇晒佢最新片段,標題為「天才在左,瘋子在右,我入過5次精神病院,so?起碼我係一個清醒嘅瘋子,好過你地呢班所謂嘅正常人」,老實講我百感交集,甚至有啲想喊。

條片有好多地方令我驚嘆,首先係佢講嘢極度流暢,亦都唔似有講稿,最多只係擬定過下題目咁,而且全程貼題。

第二,佢揭秘自己過去,成件事即刻變得戲劇化,就好似電影啲殺人狂剖析點解要大開殺戒咁,有嗰種「啊!原來係咁」嘅感覺。內容方面,先不論其真假(但你睇到佢流暢度同入邊幾間醫院嗰PART就唔似係假),但都幾肯定香港有唔少細路受到極端化的揣測同對待,你郁多啲就話你過度活躍,唔出聲就話自閉,故作緊張胡亂就醫,結果搞到身心都唔健康,就算唔醫,父母夾硬將自己嗰套強加細路身上,結果個性被扼殺,甚至心理不平衡等情況。

第三,佢對香港人偽善,不合邏輯的思想的批判,竟然準到得人驚。過往兩三年,無論係歌手去世,天災人禍,定純粹只係俗稱嘅睇人仆街,都展現出令人作嘔嘅虛偽情緒表現,好似話為死咗嘅歌手喊,然後PO上網(但你根本未撚聽過佢歌甚至唔識佢)。劉馬車自己提及被勸喻舉止正常嘅的遭遇,美國同性婚姻合法化後轉頭像的風氣,乃至涉及政治的雨革入面,泛民同黃絲帶的和理非非,自己唔打飛機人地都唔可以打飛機的行為,同埋最近天津人禍,眾多港豬又再呈現與政治切割的風氣,又話中國人都係人唔可以講報應之類的說話等等。。。。。。例子多如繁星,日日新鮮。劉馬車直指香港人偽善,明明鍾意睇人痴線睇人仆街,明明自己對外地災難及死傷者漠不關心,卻要一副道德魔人的姿態,鬧其他唔講正面說話的人。

講到呢度,平時看似瘋瘋癲癲的劉馬車,竟然係一個有過去有故事,且洞悉香港世態得如此透徹的「正常人」。現實世界的各種黑暗同不幸,從來就比眼前及螢幕上的正能量事物多,係劉馬車呢個正常人的背後,喺我地周圍的人群當中,究竟有幾多個,真係可以坦誠面對一切,然後表達出內心最真實一面的人存在?



(劉馬車片段截圖)


作者
讀者回應